ԵՐԵՎԱՆ, 14 մայիսի — Sputnik, Լաուրա Սարգսյան. Armenia ավիաընկերության օդաչու Էդուարդ Կարապետյանն այսօր առաջին թռիչքն է կատարել (Երևան–Բեյրութ–Երևան չվերթը) Boeing 737 օդանավի հրամանատարի կարգավիճակում։
33–ամյա փորձով օդաչուն թողել է Արաբական Միացյալ Էմիրություններն ու վերադարձել հայրենիք, երբ առաջարկ է ստացել Armenia ավիաընկերությունից։
«Ես արդեն թռել եմ 22 հազար 500 ժամ։ Ծնվել եմ ավիացիոն ընտանիքում, հայրս և եղբայրս օդաչուներ են, մայրս աշխատել է օդանավակայանում», – Sputnik Արմենիայի թղթակցի հետ զրույցում ասաց Կարապետյանը։
Կարապետյանը Armenia–ի օդաչուական անձնակազմի երրորդ հրամանատարն է, բայց ինքնաթիռի հրամանատարի դերը նոր չէ նրա համար։
Նախկինում նա եղել է Ան-24–ի, Bombardier Canadair Regional Jet (CRJ) ինքնաթիռի հրամանատար, այդ կարգավիճակում նա թռել է 15 հազար ժամ։
Armenia–ում երրորդ հրամանատարի նախապատրաստությունը մեծ ձեռքբերում են համարում երիտասարդ ավիաընկերության համար։
«Նա ավիաընկերության երրորդ հրամանատարն է, փորձառու օդաչու։ Ավիաընկերությունը երկու տարվա ընթացքում նախապատրաստել է ութ երկրորդ օդաչուների և երեք հրամանատարների», – Sputnik Արմենիայի թղթակցի հետ զրույցում ասաց Armenia ավիաընկերության փոխտնօրեն Գևորգ Խաչատրյանը։
Նրա խոսքով` այս տարի ավիաընկերությունը ծրագրում է 2 օդաչուներ նախապատրաստել երկրորդ օդաչուի տեղի համար։
«Armenia»-ի ավիապարկում երկու ինքնաթիռ կա` Boeing 737-500, Boeing 737-700։ Ընկերությունն ունի 53 աշխատակից։ Ավիաընկերության հիմնադիրներն են Աշոտ Թորոսյանը (51 տոկոս բաժնետոմս), Թամազ Գաիաշվիլին (24 տոկոս) և Ռոբերտ Օգանեսյանը (25 տոկոս):
Հայաստանն ազգային ավիափոխադրողից զրկվել է 2013 թվականին` «Արմավիա» ընկերության սնանկացումից հետո: Հայրենական ավիաշուկայում այսօր երկու հայկական ընկերություն է գործում` «Armenia»-ն և «Տարոն-Ավիան»։