ԵՐԵՎԱՆ, 14 մայիսի — Sputnik, Արմենուհի Մխոյան. Գյումրիում սկսել են «մերժել» քաղաքապետ Սամվել Բալասանյանին։ Հետաքրքիրն այն է, որ քաղաքապետին անվստահություն հիմնականում հայտնում են Գյումրու ավագանու «Բալասանյան» դաշինքի անդամները՝ դաշինքի 17 անդամներից 10-ը։ Նրանց են միացել նաև ավագանու անդամներ մյուս կուսակցություններից՝ 1 անձ «Օրինաց երկրի» և 1-ը՝ «Բարգավաճ Հայաստան»:
Քաղաքապետ Սամվել Բալասանյանին անվստահություն հայտնելու համար նախաձեռնող խումբը ավագանու նիստ հրավիրելու պահանջ է ներկայացել: Ավագանու նիստը կկայանա մայիսի 17-ին՝ ժամը 10:00-ին:
Այն, որ քաղաքապետարանը նախաձեռնող խմբի կողմից արդեն ստացել է դիմում անվստահություն հայտնելու մասին Sputnik Արմենիային տեղեկացրեց նաև քաղաքապետարանի մամուլի քարտուղար Սոնա Առաքելյանը: «Գյումրու ավագանու նախաձեռնող խմբի 12 անդամ քաղաքապետարան է ներկայացրել Գյումրի համայնքի ղեկավարի նկատմամբ անվստահության որոշման նախագիծ, որն ընդունվել է քաղաքապետարանում և որին ընթացք է տրվել։ Մայիսի 17-ին, օրենքի ուժով, գումարվելու է ավագանու նիստ, որտեղ քննարկվելու է այս հարցը»,-նշեց Սոնա Առաքելյանը:
Մամուլի պատասխանատուն չշտապեց մանրամասնել քաղաքապետի կողմից նախատեսվող հետագա քայլերը: «Թերևս պետք է սպասել հենց այդ նիստին, որի ժամանակ հարցը կքննարկվի և դրանից հետո պարոն Բալասանյանը կպատասխանի բոլոր հարցերին»,- ասաց Սոնա Առաքելյանը՝ հավելելով, որ քաղաքապետարանն այս պահին բնականոն աշխատում է, բոլոր բաժիններն իրականացնում են իրենց վերապահված գործառույթները, իսկ Գյումրիում այս ընթացքում մեկնարկած որևէ ծրագիր չի դադարեցվի:
Հիշեցնենք, որ Գյումրու ավագանին ունի 33 անդամ, որոնցից 17–ը` «Բալասանյան դաշինքից»` ներառյալ քաղաքապետը, 8–ը ներկայացնում են ԲՀԿ–ն, 4–ը ՕԵԿ անդամներ են, 4–ը Գալա–ի ներկայացուցիչներ։ Ըստ օրենքի` եթե ավագանուն 1/3–րդը դեմ է քվեարկում, ապա քաղաքապետը հրաժարական է տալիս։