ԵՐԵՎԱՆ, 11 մայիսի — Sputnik. Հազիվ թե ինչ-որ մեկը փորձի Հայաստանի վրա ճնշում գործադրել Ռուսաստանի հետ ռազմատեխնիկական համագործակցության պատճառով։ Այս մասին Ռոսիա 24-ին տված հարցազրույցում ասել է ՀՀ վարչապետ Նիկոլ Փաշինյանը` մեկնաբանելով ռուսական ՌԱՀ ձեռնարկությունների նկատմամբ կիրառած ամերիկյան պատժամիջոցները։
«Չեմ կարծում, որ Հայաստանի վրա կփորձեն ճնշում գործադրել։ Նման վտանգ չեմ տեսնում։ Մենք շատ սերտ հարաբերություններով ենք կապված։ Ռուսաստանի հետ չհամագործակցել պարզապես հնարավոր չէ», — ասել է նա։
Մոսկվայի հետ ռազմատեխնիկական համագործակցությունը Հայաստանի ազգային անվտանգության հարցն է։
«Մի՞թե որևէ մեկը կփորձի մեզ վրա ճնշում գործադրել, որպեսզի մենք մեր անվտանգությանն ի վնաս գործենք», — հռետորական հարց տվեց վարչապետը։
Հիշեցնենք, որ պատժամիջոցները սահմանափակող միջոցներ են ենթադրում նաև այն պետությունների և ընկերությունների նկատմամբ, որոնք համագործակցելու են ռուսական ՌԱՀ ձեռնարկությունների հետ։
Փաշինյանը նաև շնորհակալություն է հայտնել Հայաստանի ներքաղաքական ճգնաժամի վերաբերյալ Ռուսաստանի դիրքորոշման համար, որը բավական հարգալից էր։