ԵՐԵՎԱՆ, 11 մայիսի — Sputnik. Իսրայելի հայտարարած գաղտնի տեղեկություններն այն մասին, որ Իրանը շարունակում է իր միջուկային ծրագիրը, կարող են ստացած լինել Ադրբեջանի տարածքով։ Այս մասին այսօր լրագրողներին ասաց «Նորավանք» հիմնադրամի Քաղաքական հետազոտությունների կենտրոնի ղեկավար Կարեն Վերանյանը։
«Դա պատահական չէ, հիմքեր կային։ Սկսած 2000-ականներից Ադրբեջանի ու Իսրայելի համագործակցությունը զգալիորեն խորացել է։ Պատահական չէ նաև, որ 2014 թվականին օգոստոսին Իրանի տարածք էր մտել հետախուզական ԱԹՍ-ն, որն ըստ նախնական տվյալների` Ադրբեջանի տարածքից էր արձակվել», — ասաց Վերանյանը։
Նրա խոսքով` Իսրայելի ու Ադրբեջանի համագործակցությունը նոր մակարդակի է հասել 2016 թվականին Նեթանյահուի` Բաքու կատարած այցից հետո։ Մոսսադի ղեկավար Յոսի Կոենը հայտարարել է, որ հատուկ ծառայությունների համագործակցությունը իրավական հիմքի վրա է դրվելու։
Ինչ վերաբերում է Իսրայելի, ԱՄՆ-ի ու Իրանի հարաբերությունների սրմանը, ապա դա կապված է այն բանի հետ, որ Թեհրանը շարունակում է իր ազդեցությունն ամրապնդել Սիրիայում ու Լիբանանում (մասնավորապես «Հեզբոլահ» կազմակերպության միջոցով)։
ԱՄՆ-ն Իսրայելի հետ փորձում է կանգնեցնել այդ գործընթացը։ Դրա հետևանքը դարձավ այն, որ Վաշինգտոնը հայտարարեց, թե դուրս է գալիս Իրանի հետ համաձայնագրից։
Նրա խոսքով` Իսրայելն ու Իրանը տարածաշրջանում կարևորագույն նշանակություն ունեն, նրանց հակամարտությունն անմիջապես կանդրադառնա ոչ միայն Հայաստանի անվտանգության, այլև տնտեսության վրա։
«Այդ գործընթացները, բնականաբար, բացասաբար կանդրադառնան Հարավային Կովկասի տարածաշրջանի ու Հայաստանի անվտանգության վրա», — ասաց Վերանյանը։
Հայաստանն ու հայությունն այդ դեպքում մի շարք մարտահրավերների առաջ են կանգնում։ Մերձավոր Արևելքը հետաքրքրում է Երևանին, առաջին հերթին` տարածաշրջանում բնակվող հայկական սփյուռքի անվտանգության ապահովման տեսակետից։ Վերանյանը նշեց, որ վերջին տարիներին այնտեղ ընթացող գործընթացները հուսադրող չեն։
Հիշեցնենք `ապրիլի 30-ին Նեթանյահուն հայտարարել էր, որ իր երկրի հետախուզությունը մի շարք փաստաթղթեր է ստացել, որոնք վկայում են` միջուկային գործարքը ստորագրելուց հետո Իրանը պահում է ռազմամիջուկային ոլորտի իր մշակումները` ապագայում օգտագործելու հույս ունենալով։