ԵՐԵՎԱՆ, 11 մայիսի — Sputnik. ՀՀ տրանսպորտի, կապի և ՏՏ նախարարի պաշտոնակատար Վահան Մարտիրոսյանն այլևս չի ուզում լինել նախարարի պաշտոնում։ Այս մասին նա լրագրողներին ասաց կառավարության նիստից հետո կայացած ճեպազրույցում։
«Ոչ թե չեմ ուզում Նիկոլ Փաշինյանի կառավարությունում աշխատել, այլ ցանկություն չունեմ նախարարի պաշտոնում շարունակել աշխատանքս»,-նշել է նա և հավելել, որ այս ցանկությունն այսօր չէ, որ առաջացել է, վաղուց կար:
«Հարցը Նիկոլ Փաշինյանին ու իր կառավարությանը չի վերաբերում: Ես հարգում եմ Նիկոլ Փաշինյանի մոտեցումները, բայց գտնում եմ, որ ավելի շատ օգուտ կարող եմ տալ Հայաստանին ոչ նախարարի պաշտոնում», – ասաց Մարտիրոսյանը:
Դիտարկմանը, թե մինչև այդ կարող էր օգուտներ տալ երկրին, Մարտիրոսյանը պատասխանեց. «Կարող էի արել եմ: Եթե հիշում եք՝ ինչպիսին էր 10 տարի առաջ ինտերնետի վիճակը Հայաստանում և այսօր, ես իմ լուման ունեցել եմ»:
Հանրապետական կուսակցությունը լքելու մասին հարցին, Մարտիրոսյանն ասաց`ժամանակը ցույց կտա: