ԵՐԵՎԱՆ, 10 մայիսի — Sputnik. ԱՄՆ–ն շարունակում է ըմբռնումով մոտենալ Հայաստանի ու Իրանի առևտրային ու տնտեսական համագործակցությանը։ Այս մասին այսօր մամուլի ասուլիսի ժամանակ հայտնեց իրանագետ Գոհար Իսկանդարյանը։
Չնայած Վաշինգտոնն ու Թեհրանը խիստ առճակատման մեջ են, ԱՄՆ–ն բավականին հանդուրժողական է Իրանի ու հարևան Հայաստանի ավանդական բարեկամական հարաբերությունների նկատմամբ։ Իսկանդարյանը համոզված է, որ չնայած իրանական միջուկային ծրագրի էսկալացիայի նոր շրջադարձին, Վաշինգտոնի այդպիսի վերաբերմունքը կպահպանվի։
«Ամերիկացիները հասկանում են` Հայաստանն ինչ իրավիճակում է, նրանք հասկանում են, որ արևմուտքից ու արևելքից շրջափակված երկիրը մեծ ընտրություն չունի։ Միաժամանակ Հայաստանի ու Իրանի առևտրային ու տնտեսական համագործակցության ծավալներն աննշան են, ու դրանք չեն կարող որևէ սպառնալիք ներկայացնել ամերիկացի ներդրողների համար», – նշեց իրանագետը։
Բայց իրանագետը մտավախություն ունի, որ Իրանի միջուկային գործարքից ԱՄՆ–ի դուրս գալը ու Մերձավոր Արևելքում իրավիճակի անխուսափելի ապակայունացումը կարող է խաթարել իրավիճակն Արցախում։ Տարածված քաոսի պայմաններում Ադրբեջանը կարող է արկածախնդրության դիմել արցախյան հակամարտության գոտում։
ԱՄՆ նախագահ Դոնալդ Թրամփը մայիսի 8–ին հայտարարել է, որ երկիրը դուրս է գալիս Գործողությունների համատեղ համապարփակ ծրագրից։ Ամերիկյան կողմը կարծում է, որ համաձայնագիրը Թեհրանին միջուկային զենք արտադրելու հարցում գործողությունների ազատություն է տվել։
Իրանի նախագահ Հասան Ռոհանին իր հերթին հայտնել է, որ դուրս չի գալիս համաձայնագրից, քանի որ Թեհրանի ու բանակցություններին մասնակցած հինգ երկրների միջև պայմանավորվածությունը շարունակում է ուժի մեջ մնալ։
Իրանի ու «վեցնյակի» (Ռուսաստան, ԱՄՆ, Չինաստան, Մեծ Բրիտանիա, Ֆրանսիա ու Գերմանիա) միջև համաձայնագիրը ստորագրվել է 2015 թվականի հուլիսին Վիեննայում։
Դրա կատարումը հանում էր Թեհրանի վրայից ավելի վաղ ՄԱԿ-ի Անվտանգության խորհրդի, ԱՄՆ-ի ու Եվրամիության սահմանած տնտեսական ու ֆինանսական պատժամիջոցները, որոնք կիրառվում էին միջուկային մշակումների պատճառով։