ԵՐԵՎԱՆ, 10 մայիսի — Sputnik. ԱՄՆ-ն փորձում է համոզել ԵՄ-ին հակաիրանական պատժամիջոցներ կիրառել, եթե դա հաջողվի, կարող է հերթը հասնել նաև Հայաստանին, այսօր լրագրողներին ասաց Սերգեյ Շաքարյանցը։
Նրա խոսքով` ամերիկացիները դեռ ՀՀ առաջին նախագահ Լևոն Տեր-Պետրոսյանի ձեռքով էին փորձում Հայաստանը ներգրավել հակաիրանական գործողություններում։
Մասնավորապես, ոչ մի լուրջ տնտեսական նախագծեր չէին իրականացվում։ Միայն երկրորդ նախագահ Քոչարյանի օրոք որոշակի փոխգործակցություն սկսվեց։
«Այսօրվա պայմաններում կարելի է խոսել Հայաստանի համար առկա մեծ վտանգի մասին», — ասաց Շաքարյանցը։
Նրա խոսքով` եթե ԵՄ-ն միանա հակաիրանական ակցիային, ապա Վաշինգտոնը Բրյուսելի միջոցով կփորձի այդ գործընթացին ներգրավել նաև Հայաստանը։ Եվրոպան կարող է հղում անել ԵՄ-ի հետ համաձայնագիրը ստորագրելուց հետո «քաղաքականության ընդհանուր գիծը» պահպանելու անհրաժեշտությանը։
Եթե Հայաստանը համաձայնի, ապա դա Թեհրանի կողմից խիստ արձագանք կառաջացնի։
Միևնույն ժամանակ, քաղաքագետի կարծիքով, Եվրոպան բոլորից շատ է մտահոգված Իրանի նկատմամբ կիրառվող հավանական պատժամիջոցներով։ Իսկ ԱՄՆ-ն փորձում է ԵՄ-ին համոզել միանալ հակաիրանական գործողություններին։
«Իրանի հետ դիմակայությանը նրանք չեն ուզում ներգրավվել, ինչպես եղավ Լիբիայի դեպքում», — ասաց Շաքարյանցը։
ԵՄ-ն հակաիրանական քաղաքականության հետևանքով կարող է զրկվել էներգետիկ ռեսուրսների մի մասից, եթե հանկարծ Թեհրանը փակի Պարսից ծոցը։
Ինչ վերաբերում է ԱՄՆ գործողություններին, ապա, փորձագետի կարծիքով, սպասելի էր, որ Վաշինգտոնը դուրս կգա միջուկային համաձայնագրից։
Այժմ ԱՄՆ-ն Իսրայելի հետ փորձում է ապացուցել, որ Իրանը ֆինանսավորում է ահաբեկիչներին և որ Սիրիայում ԻԻՀ-ի բազաներ կան։ Այս պնդման հետ համաձայն չեն Ռուսաստանն ու Չինաստանը։
«Հազիվ թե Իսրայելի և ԱՄՆ-ի ուժերը բավականացնեն Իրանի դեմ ցամաքային գործողություններ իրականացնելու համար, ես դրան չեմ հավատում», — ասաց Շաքարյանցը։
Այդ պատճառով, ըստ փորձագետի, նրանք որոշակի PR-ակցիաներ են կիրառելու սեփական ռազմական հաջողությունները ցույց տալու համար։ Օրինակ` նման ակցիա կարելի է համարել Իսրայելի հայտարարությունն այն մասին, որ Սիրիայում իբր 15 իրանցի զինվոր են սպանել։
Իրանի հետ համաձայնագրից դուրս գալու Թրամփի որոշումը, Շաքարյանցի խոսքով, կապված է նրա փեսայի` ԱՄՆ ռադիկալ հրեական շրջանների ներկայացուցչի ազդեցության հետ։ Մինչ օրս ԱՄՆ նախագահները խուսափում էին ճանաչել նաև Երուսաղեմը, սակայն Թրամփը գնաց այդ քայլին։
ԱՄՆ նախագահ Դոնալդ Թրամփը երեքշաբթի հայտարարեց, որ ԱՄՆ-ն դուրս է գալիս 2015 թվականին միջազգային միջնորդների «վեցյակի» (Ռուսաստան, ԱՄՆ, Բրիտանիա, Չինաստան, Ֆրանսիա, Գերմանիա) և Իրանի միջև կնքված միջուկային համաձայնագրից։ Բացի այդ, Թրամփը հայտարարեց բոլոր պատժամիջոցները վերականգնելու մասին, որոնց գործողությունները կասեցվել էին գործարքի արդյունքում։
Իրանը, միևնույն ժամանակ, մտադիր չէ դուրս գալ համաձայնագրից, քանի որ պայմանավորվածությունը շարունակելու է գործել Թեհրանի և բանակցություններին մասնակցած մյուս հինգ երկրների միջև։