ԵՐԵՎԱՆ, 9 մայիսի — Sputnik. Նոր կառավարությունը կհարգի նախկին վարչապետ Սերժ Սարգսյանի` կառավարական առանձնատան սեփականության իրավունքից հրաժարվելու մասին դիմումը։ Այս մասին այսօր Արցախում լրագրողների հետ հանդիպմանն ասաց ՀՀ վարչապետ Նիկոլ Փաշինյանը։
Նա նաև հայտնեց, որ որպես Սարգսյանը կստանա օրենքով նախատեսված բոլոր արտոնությունները։
Հիշեցնենք, մարտի 29-ին ՀՀ կառավարությունը որոշում էր կայացրել «Կոնդի առանձնատների տնտեսություն» ՊՈԱԿ-ի հաշվեկշռում եղած 6-րդ մասնաշենքում գտնվող շենքը և շինությունները՝ 1.5365 հա սպասարկման տարածքով, սեփականության իրավունքով անհատույց տրամադրել Սերժ Սարգսյանին՝ որպես բնակարան:
Սա կառավարական այն առանձնատունն է, որտեղ Սերժ Սարգսյանը բնակվել էր իր պաշտոնավարման ընթացքում։
Ապրիլի 17-ին ԱԺ արտահերթ նիստում, երբ քննարկվում էր Սերժ Սարգսյանին վարչապետ ընտրելու հարցը, «Ելք» խմբակցությունն անդրադարձել էր այդ առանձնատան հարցին` կոչ անելով Սերժ Սարգսյանին հրաժարվել դրանից։
Ի պատասխան Սերժ Սարգսյանն արձագանքել էր. «Եթե օրենքով չի հասնում, կարող եմ հետ վերադարձնել: Բայց եթե հասնում է, կարող եք շնորհավորել, որովհետև բոլոր դեպքերում ես էլ ունեցա սեփական տուն Երևանում»։
Մեկ օր անց`ապրիլի 18-ին, Սերժ Սարգսյանը կառավարության նիստում հայտարարել էր, որ հրաժարվում է իրեն հատկացված սեփականությունից։
Կառավարության մարտի 29-ի որոշումը մինչ օրս չեղյալ չի ճանաչվել։