ԵՐԵՎԱՆ, 9 մայիսի — Sputnik. Ռեժիսոր Յուսուպ Ռազիկովն ավարտել է մեծանուն կոմպոզիտոր Արամ Խաչատրյանի մասին ֆիլմի նկարահանումները։ Այս մասին նշված է «Մարս Մեդիա» կինոընկերության մամուլի հաղորդագրությունում։
«Ես մանկուց հետաքրքրվել եմ Արամ Խաչատրյանի ստեղծագործությամբ, ուստի ինձ գրավեց մեծանուն կոմպոզիտորի մասին ֆիլմ նկարելու հնարավորությունը, որի ստեղծագործություններում հզորություն, ուժ, մեծություն է զգացվում։ Դա անհավանական զգացողություն էր` այդ աշխատանքի շնորհիվ ընկղմվել բալետի և երաժշտության աշխարհ։ Մեր ֆիլմը պատմում է, թե ինչպիսի պայմաններում է ստեղծվել «Սուսերով պարը» «Գայանե» բալետի համար։ Իրադարձությունները զարգանում են 1942թ-ին Մոլոտով քաղաքում, ուր Արամ Խաչատրյանին ուղարկում են Լենինգրադի օպերայի և բալետի ակադեմիական թատրոնի հետ», — իր նոր աշխատանքի մասին պատմել է ռեժիսորը։
Ֆիլմի նկարահանումներն իրականացվել են երկու մասով. առաջինը` Ռուսաստանում` Յարոսլավում և Յարոսլավի շրջանում, երկրորդը` Հայաստանում, այդ թվում` Երևանի Ա. Սպենդիարյանի անվան օպերայի և բալետի ազգային ակադեմիական թատրոնում և Խոր վիրապ եկեղեցում։
Կոմպոզիտոր Արամ Խաչատրյանի կերպարը մարմնավորել է «Պյոտր Ֆոմենկոյի արվեստանոցի» դերասան Համբարձում Քաբանյանը։ Ֆիլմի պրոդյուսերը Ռուբեն Դիշդիշյանի «Մարս Մեդիա» կինոընկերությունն է` Ռուսաստանի մշակույթի նախարարության աջակցությամբ։