ԵՐԵՎԱՆ, 7 մայիսի — Sputnik. «№ 1 օրենքով գող» Շաքրո Մոլոդոյի (Զախարի Կալաշով) դատավճռից հետո գողական աշխարհում լուրջ վերադասավորումներ են սկսվել։ Գործընթացը գնում է դանդաղ, բայց հաստատուն քայլերով։ Մյուս «օրենքով գողերը» սկսում են իրար մեջ կիսել Շաքրոյի կայսրությունը։ Այստեղ հիմնական գործող անձանցից մեկը Էդիկ Ասատրյանն է (Էդիկ Օսետրինա), գրում է «Փրայմ քրայմ» պարբերականը:
Ժամանակին Օսետրինան շատ մոտ է եղել գողական աշխարհի առաջնորդ, «օրենքով գող» Դեդ Հասանի հետ (Ասլան Ուսոյան, սպանվել է 2013թ-ին)։ Հետագայում նրանց միջև տարաձայնություններ են առաջացել։ Ըստ վարկածներից մեկի` պատճառը դարձել են որոշ «օրենքով գողերի» կարգավիճակի վերաբերյալ անհամաձայնությունները, մեկ այլ վարկածի համաձայն` պատճառը եղել է Էդիկ Օսետրինայի ակտիվությունը Ռոստովի մարզում և Կուբանում։
Ինչպես նշում է աղբյուրը, Էդիկ Օսետրինան վերջին շրջանում մեծ ակտիվություն է ցուցաբերում Կրասնոդարի երկրամասում և Ռոստովի շրջանում` տարածքներ, որոնք վերջին մի քանի տարիների ընթացքում վերահսկում են Շաքրո Մոլոդոյի կլանի անդամները։ Իր դիրքերն ամրապնդելու համար Օսետրինան կապեր է հաստատում և զարգացնում Դեդ Հասանի շրջապատի հետ։
«Մասնավորապես, նրան հաճախ կարելի է հանդիպել «քրեական գեներալներ» Վագիֆ Սուլեյմանովի (Վագիֆ) և Դմիտրի Չանտուրիայի (Միրոն) հետ», — գրում է պարբերականը։
Բացի այդ, Օսետրինան շատ մոտ է «օրենքով գող» Օլեգ Շիշկանովի հետ (Շիշկան), որը համարվել է Շաքրոյի առավել հավանական թեկնածուն, տեղեկություններ են ստացվել, որ վերջինը նույնիսկ համաձայնվել է այդ թեկնածությանը։ Այնուամենայնիվ, «գողական աշխարհի» յուրահատկությունների պատճառով Շաքրոյի Մոլոդոյի հետնորդ համարվելը որոշակի ժամանակ է պահանջում, դրանից էլ օգտվում է Էդիկ Օսետրինան։
Որոշ տվյալներով` Ասատրյանն արդեն որոշ գործարարների «ճանապարհը փակելու» փորձեր է ձեռնարկել, որոնք աշխատում են Շաքրոյի մարդկանց հետ (հիմնականում նրանք հայերն են ու հույները) Ռոստովում և Կրասնոդարում։ Նրանց միացել են Ասատրյանի մարդիկ, բացատրելով, որ այսուհետև կոմերսանտները, որոնք կհրաժարվեն Շաքրոյի կլանի մարդկանց հովանավորությունից (դա, օրինակ, Դավիթ և Շավլա Օսմանովներն են, ինչպես նաև Նոդար Ասոյանը, Շաքրոյի հետ նրանց կապում են ազգակցական կապեր), պետք է անցնեն Օսետրինայի խնամակալության տակ։
Էդիկ Օսետրինայի կյանքն անհասկանալի պատճառներով թեթևացրել են իրավապահ մարմինները։ Աղբյուրի համաձայն, վերջին շրջանում Ասատրյանը հայտնվել է «օրենքով գողերի» ցուցակի մեջ, որոնք չի կարելի ձեռք տալ։
Շաքրոյի կլանի «օրենքով գողերի» արձագանքի մասին առայժմ շատ բան հայտնի չէ։ Ինչպես նշում են աղբյուրները, առայժմ Կալաշովը Մոսկվայում է (քննչական մեկուսարանում), Էդիկ Օսետրինան չի գնա բացահայտ հակամարտության և պատերազմի Շաքրոյի կլանի դեմ։ Ինչ վերաբերում է հետագա իրադարձություններին, ամեն ինչ անորոշ է։ Այնուամենայնիվ, եթե գաղութում Զախարի Կալաշովը կտրված լինի արտաքին աշխարհից, հիմքեր կան ենթադրելու, որ այդ ընթացքում նրա կլանի դեմ իսկական քրեական պատերազմ կսկսվի։