ԵՐԵՎԱՆ, 7 մայիսի — Sputnik. ԱԺ–ը կընդունի Նիկոլ Փաշինյանի ձևավորած ժամանակավոր կառավարության ծրագիրը։ Նման տեսակետ այսօր ԱԺ–ում լրագրողների հետ հանդիպմանն ասաց ԱԺ ՀՅԴ խմբակցության ղեկավար Արմեն Ռուստամյանը։
Փաշինյանի ղեկավարած կառավարության ծրագիրը մերժելու տարբերակը Ռուստամյանը խելամիտ չի համարում` նշելով, որ այդ դեպքում նորից նույն շրջապտույտը կսկսվի։
Արտահերթ ընտրությունների համար Ռուստամյանը ժամկետ չնշեց, բայց ասաց, որ արտահերթ ընտրություններին ընդառաջ նախ պետք է ձևավորվի իրական ընտրական միջավայր, որի դեպքում ընտրության արդյունքները պետք է ընդունելի լինեն բոլորի համար։
Իսկ նոր կառավարության կազմում լինելուց ՀՅԴ–ն, ըստ Ռուստամյանի, չի հրաժարվի։
«Մենք ասել ենք, որ ակնկալիք չունենք, որ պետք է մաս կազմենք, բայց նաև չենք ուզում, որ Փաշինյանի կառավարությունը չհաջողի այն բոլոր հարցերում, որոնք առաջադրել է, ուստի մեր բոլոր կարողություններով աջակցելու ենք։ Դաշնակցությունը պատրաստ է ներդնել իր ամբողջ ներուժը։ Մենք չենք պատրաստվում մենակ թողնել Նիկոլ Փաշինյանին»,– ասաց Ռուստամյանը։
Նոր կառավարության համար Ռուստամյանն առաջնահերթ համարեց նոր ընտրական օրենսգրքի ընդունումը, արտաքին մարտահրավերների վերացումը։ Նշեց նաև, որ անհրաժեշտ է իրականացնել կառուցվածքային փոփոխություններ։ Օրինակ` Ոստիկանությունը, Ազգային անվտանգության ծառայությունը պետք է նախարարությունների վերածվեն։
Միջազգային կառույցների` ԵՄ–ի, ԵԱՏՄ–ի, ՀԱՊԿ–ի հետ հարաբերությունները, Ռուստամյանի խոսքով, պետք է պահպանվեն ու զարգանան։
Հիշեցնենք, վաղը` մայիսի 8–ին ԱԺ–ում նախանշված են ՀՀ վարչապետ ընտրությունները։ Առաջադրված միակ թեկնածուն այս պահին Նիկոլ Փաշինյանն է։ Առաջադրման ժամկետն ավարտվում է այսօր` ժամը 18։00–ին։