ԵՐԵՎԱՆ, 7 մայիսի — Sputnik. ՀՀ չորրորդ նախագահ Արմեն Սարգսյանը շատ լավ է ճանաչում Ադրբեջանի նախագահ Իլհամ Ալիևին, այդ պատճառով նա չի բացառում, որ Արցախում լարվածություն կարող է լինել։ Այս մասին Սարգսյանը խոսել է «Էխո Մոսկվի» ռադիոկայանի հետ հարցազրույցում` պատասխանելով այն հարցին` կարող է արդյո՞ք Հայաստանում իշխանափոխությունը ազդել Բաքվի հետ հարաբերությունների վրա։
«Ոչ մի կերպ չեմ կարող մեկնաբանել դա։ Անձամբ ճանաչում եմ նախագահ Իլհամ Ալիևին։ Բավականին լավ։ Սակայն իրավիճակն ու քաղաքականությունն այնպիսին են, շատ զգայուն պահ է, և ոչ մի դեպքում չի կարելի բացառել Արցախում լարվածության աճը», — պարզաբանել է Սարգսյանը։
Նախագահն ընդգծել է, որ առաջին իսկ օրվանից կառավարությունը պետք է լրջորեն զբաղվի սահմանների անվտանգությամբ: Այդ առումով նա անդրադարձել է նաև Մոսկվայի հետ հարաբերություններին:
«Մոսկվան Հայաստանի ռազմավարական և տազմաքաղաքական գործընկերն է: Բոլորին հայտնի է, որ Հայաստանի բանակը շատ մոտ է ռուսական բանակին, և մեր բանակին աջակցում է Ռուսաստանը սպասազինությամբ, այլ ոչ թե ՆԱՏՕ-ն կամ Չինաստանը»,- ասել է ՀՀ նախագահը:
Նա հիշեցրել է, որ Հայաստանն ու Ռուսաստանը անվտանգության նույն կազմակերպության անդամներ են՝ վստահեցնելով, որ Հայաստանին անհրաժեշտ է ռուսաստանյան ռազմաբազան:
Ուստի ՀՀ նախագահը պայքարելու է, որպեսզի Հայաստանի և Ռուսասանի բարեկամական, եղբայրական և ռազմաքաղաքական հարաբերությունները սերտ մնան, առավել ևս, որ ռուսական ռազմաբազան տեղակայված է Թուրքիայի հետ Հայաստանի սահմանի մոտակայքում: