ԵՐԵՎԱՆ, 6 մայիսի — Sputnik.Նոր մարզիչի մոտ Եվգենյա Մեդվեդևան կաճի և՛ սահքի առումով, և՛ արտիստիզմի։ ՌԻԱ Նովոստիի հետ զրույցում այսպիսի կարծիք է հայտնել Ռաֆայել Հարությունյանը։
Օրերս գեղասահորդուհին հայտնել էր, որ լքում է հայտնի Էթերի Տուտբերիձեին, որի մոտ մարզվել է ութ տարեկանից։ Նա այսուհետ մարզվելու է կանադացի Բրայան Օրսերի մոտ։
Ժամանակին Տուտբերիձեի թիմը լքել է Յուլյա Լիպնիցկայան՝ Սոչի 2014-ի թիմային մրցումների չեմպիոնը։ 2017 թվականին նա ավարտել է իր կարիերան։
Հարությունյանը կարծում է՝ Մեդվեդևան նոր մարզչի մոտ ավելի շատ իրեն բացահայտելու հնարավորություն կունենա։ Հատկապես, որ կանադացու մոտ նա ակնհայտորեն աղջիկների շարքում համար առաջինը կդառնա։
Տղամարդ մենասահորդներից նրա մոտ մարզվում են վերջին տարիների ամենավառ մարզիկները՝ ճապոնացի Յուզուրու Խանյուն ու իսպանացի Խավիեր Ֆերնանդեսը։ Աղջիկների շարքում՝ Գաբրիելա Դեյլմանը, որը Փհենչհանում թիմային մարզումներում օլիմպիական չեմպիոն դարձավ ու մենասահքում 15-րդ տեղը զբաղեցրեց։ Սակայն Հարությունյանը կարծում է, որ Մեդվեդևան իր տեսակով եզակի կլինի։
«Իհարկե, Մեդվեդևան պրիմա է, նրա կարգավիճակը թելադրում է այդ դերը։ Համոզված եմ՝ նա առաջընթաց կունենա և՛ սահքի, և՛ արտիստիզմի առումով։ Տվյալ դեպքում ինձ մոտ մեկ հարց է առաջանում` արդյո՞ք մրցավարները կտեսնեն դա ու եթե տեսնեն՝ ինչպես կգնահատեն», — ասել է Հարությունյանը։
Հարությունյանը աշխարհահռչակ մարզիչ է։ Նրա վերջին սաներից է ամերիկացի մարզիկ Նաթան Չենը, որը Սոչիի Օլիպմիադայի բրոնզե մրցանակակիր է։