ԵՐԵՎԱՆ, 4 մայիսի — Sputnik. Բողոքի շարժման առաջնորդ Նիկոլ Փաշինյանը ձգտում է հնարավորինս արագ ԱԺ արտահերթ ընտրություններ անցկացնել, քանի որ նրա լայնածավալ սոցիալական աջակցությունը նվազելու է, այսօր լրագրողներին ասաց քաղաքագետ, Կովկասի ինստիտուտի տնօրեն Ալեքսանդր Իսկանդարյանը։
Նրա խոսքով` եթե ՀՀԿ-ն քվեարկի այնպես, ինչպես խոստացել է, ապա Փաշինյանը վարչապետ կդառնա, բայց խորհրդարանում կշարունակի մեծամասնություն կազմել ՀՀԿ-ն։ Բայց անգամ դա կարող է ամենամեծ խնդիրը չլինել, ամենակարևոր հարցը լինելու է սեփական խոշոր խմբակցության բացակայությունը։
«Նա օգտվելու է մյուս խմբակցությունների ձայներից, հիմնականում «Ծառուկյան» խմբակցության, ՀՅԴ-ի և որոշ հանրապետականների, որոնց ՀՀԿ-ն թույլ կտա քվեարկել Փաշինյանի օգտին», — ասաց Իսկանդարյանը։
Ակնհայտ է, որ նոր ընտրություններ պետք են, որոնց անցկացումը միանգամայն հավանական է։ Այլապես Փաշինյանը ստիպված կլինի դիմել և՛ դաշնակցականների, և՛ «Ծառուկյան» դաշինքի օգնությանը և որոշակի պայմանավորվածությունների գնալ նրանց հետ։
Նոր ընտրությունների անցկացման համար Փաշինյանն, ամենայն հավանականությամբ, պետք է փոխի Ընտրական օրենսգիրքը։ Իսկ դրա համար էլ պետք է համոզի խորհրդարանին։
Միևնույն ժամանակ փողոցի ճնշումը մշտական լինել չի կարող։
«Փաշինյանը ռեսուրսներ ունի։ Այլ հարց է, որ այդ գործողությունները պետք է արագ կատարվեն, քանի դեռ այդ ռեսուրսը (մեծ ճանաչումը) չի փոքրացել այնքան, որ դադարի գործել։ Իսկ լայն սոցիալական աջակցությունն անպայման կփոքրանա», — ասաց Իսկանդարյանը։
Այդ գործընթացի ընթացքում, նրա խոսքով, կադրային սով է առաջանալու, քանի որ Փաշինյանի պահեստայինների նստարանը չափազանց կարճ է։ Ըստ Իսկանդարյանի` ընդդիմադիր գործչի կողքին կանգնած էին մարդիկ, որոնք կարող էին ցույցեր կազմակերպել, բայց հասկանալի չէ, թե ինչպես են կառավարելու։
Այդ պայմաններում, նրա կարծիքով, իշխանությունում քիչ թե շատ պատահական մարդիկ են հայտնվելու, քանի որ Փաշինյանը չունի ստվերային կաբինետ, մասնագետների կազմակերպված խումբ։
Չինովնիկների ստորին և միջին շերտը չի փոխվի, բայց ղեկավար պաշտոններում եղած մարդկանց փոխելու համար շատ մարդիկ են պետք։ Հին իշխանությունից մարդիկ կգան, ընկերների ընկերներ, Փաշինյանի մտերիմ շրջանի հին ու նոր ծանոթներ։
«Այժմ բանակցություններ են ընթանում, պաշտոններ, առավելություններ ստանալու փորձ։ Կլինեն նրանք, ովքեր ժամանակին են անցել նրա կողմ, ովքեր նրա կողքին են եղել վաղուց կամ բողոքի շարժման ընթացքում», — ասաց Իսկանդարյանը։
Նրա խոսքով` իշխանափոխությունից հետո հնարավոր կլինի խոսել նաև վերնախավի աստիճանաբար փոփոխման մասին։
Մյուս կողմից` բարդ հարց է, թե ինչպես է իրագործվելու օլիգարխների դեմ պայքարը, երբ Փաշինյանին անհրաժեշտ է «Ծառուկյան» դաշինքի պատգամավորների աջակցությունը։