ԵՐԵՎԱՆ, 2 մայիսի — Sputnik. ՀՀ առաջին նախագահ, Հայ ազգային կոնգրեսի նախագահ Լևոն Տեր–Պետրոսյանը հայտնել է, որ Հայաստանում տիրող ալեկոծության համատեքստում իր ասածը կարող է մանրուք թվալ, բայց չի կարող ուշադրություն չհրավիրել մի հանգամանքի վրա։ Armlur–ը հրապարակել է Տեր–Պետրոսյանի հայտարարությունը։
«ՀՀ Սահմանադրության 94-րդ հոդվածում ամրագրված է. «Պատգամավորը ներկայացնում է ամբողջ ժողովրդին, կաշկանդված չէ հրամայական մանդատով, առաջնորդվում է իր խղճով և համոզմունքներով։ Հետևաբար մանդատից հրաժարվելու՝ պատգամավորներ Գրիգոր Ավալյանին, Ֆելիքս Ցոլակյանին և Աղվան Վարդանյանին ներկայացվող պահանջը հակասահմանադրական է»,- նշել է Տեր-Պետրոսյանը։
Միջազգային հանրությունն այս օրերին անընդհատ պնդում է, որ իշխանության ձևավորման գործընթացում ամենակարևորը սահմանադրության և օրենքի տառին դրա համապատասխանության փաստն է։ Տեր Պետրոսյանի խոսքով` առանց միջազգային հանրության հուշելու էլ ինքնըստինքյան ակնհայտ է, որ դա բխում է, թե՛ իշխանության, թե՛ ընդդիմության, և թե՛ Հայաստանի շահերից։
«Այլ կերպ ձևավորված իշխանության օրինակարգությունը (լեգիտիմությունը) չի ճանաչվի ո՛չ ժողովրդի, ո՛չ էլ միջազգային հանրության կողմից։ Իսկ մենք տասնամյակներ շարունակ ականատեսն ենք այն բանի, թե այս իրողությունն ինչպիսի սպառնալիքներ է ստեղծում երկրի կայունության ու ներազգային համերաշխության ապահովման հարցում»,- ասել է ՀՀ առաջին նախագահը։
Հիշեցնենք, որ ԱԺ ՀՀԿ խմբակցության անդամ Գրիգոր Ավալյանը երեկ` մայիսի 1-ին, հրաժարականի դիմում էր ներկայացրել, նույն խմբակցության պատգամավոր Ֆելիքս Ցոլակյանը, դեմ գնալով խմբակցության` միաձայն դեմ քվեարկելու որոշմանը, կողմ էր քվեարկել Նիկոլ Փաշինյանի թեկնածությանը։ ՀՅԴ խմբակցության անդամ Աղվան Վարդանյանը նույնպես ընդդիմացել էր խմբակցության որոշմանը և դեմ էր քվեարկել Փաշինյանին` հայտարարելով, որ պատրաստ է ցած դնել մանդատը։ Ավելի ուշ ՀՅԴ Գերագույն մարմինը պահանջեց, որ Աղվան Վարդանյանը վայր դնի պատգամավորական մանդատը։