ԵՐԵՎԱՆ, 1 մայիսի — Sputnik. ՀՀ վարչապետի ընտրության հաջորդ փուլում ևս ընդդիմությունը հանդես կգա միասնական թեկնածուով։ Այս մասին այսօր ԱԺ նիստից հետո լրագրողների հետ զրույցում հայտնեցին ՀՅԴ և «Ծառուկյան» խմբակցությունների ներկայացուցիչները։
«Այս պահից սկսած` պետք է ամեն ինչ անենք համաձայնեցված և մեկ շաբաթ հետո դարձյալ ներկայանանք միասնական թեկնածուով»,-ասաց ՀՅԴ պատգամավոր Արմեն Ռուստամյանը։
Վարչապետի ընտրությունը երկրորդ անգամ տապալելու և արտահերթ ընտրություններ անցկացնելու դեպքում Ռուստամյանը կասկած հայտնեց, որ ստեղծված իրավիճակում քաղաքական ուժերը կկարողանան պատրաստ ներկայանալ։
Անդրադառնալով ՀՀԿ-ի դեմ քվեարկելուն` Ռուստամյանն ասաց, որ Հանրապետականը դրանով դրժեց իր խոստումը, քանի որ նախապես հայտարարել էր, որ եթե խորհրդարանական երեք ուժերը հանդես գան մեկ միասնական թեկնածուով, չի խոչընդոտելու ընտրությունը։
«Փաստորեն, խոչընդոտեց»,- ասաց նա։
«Ծառուկյան» խմբակցության պատգամավոր Նաիրա Զոհրաբյանը ՀՀԿ-ի քայլն այսպես որակեց. «Ես կարծում են, որ ՀՀԿ-ն պատերազմ է հայտարարել սեփական ժողովրդին։ Մենք հույս ունեինք, որ այնքան խոհեմություն կունենան, որ չեն գնա այս քայլին։ Բայց ինչպես տեսնում ենք, մենք ավելի լավ էինք մտածում իրենց մասին, քան իրենք կան իրականում»։
Ինչ վերաբերում է վարչապետի ընտրության երկրորդ փուլին, Զոհրաբյանը ևս վստահություն հայտնեց, որ ընդդիմությունը դարձյալ հանդես կգա միասնական թեկնածուով։
Հիշեցնենք, որ ՀՀ Սահմանադրության համաձայն`եթե ԱԺ-ն վարչապետ չի ընտրում, 7 օր հետո նշանակվում է նոր ընտրություն։ Երկրորդ փուլին թեկնածու առաջադրելու համար, սակայն, ԱԺ խմբակցությունները պետք է ունենան պատգամավորների ընդհանուր թվի 1/3-ի` 35 պատգամավորի համաձայնությունը։