ԵՐԵՎԱՆ, 1 մայիսի — Sputnik. Այո, այսօր մեր երկրում նոր իրողություններ և նոր իրավիճակ է։ ՀՀ վարչապետի թեկնածուի ելույթից հետո ասաց ՀՀԿ խմբակցության պատգամավոր, ԱԺ փոխխոսնակ Էդուարդ Շարմազանովը։
«Հարկ եմ համարում նշել, որ այս օրերի ընթացքում իշխանությունը ցուցաբերել է բացառիկ զսպվածություն, հասարակությունը չի բաժանել մերոնքականների և ձերոնքականների»,–ասաց Շարմազանովը` նշելով, որ պատմությունն ամենիքս և ամեն ինչ կդնի իր տեղը։
ԱԺ փոխխոսնակը նշում է, որ Հայաստանում ժողովրդավարական արժեքները տեղ ունեն և բոլորը պարտավոր են հարգել բազմակարծությունը։
«Ինձ համար անընդունելի է ճնշում գործադրել որևէ պատգամավորի վրա` ընտրություն անելու համար։ Այսօր մենք ընտրում ենք, ոչ թե լավ հռետոր, այլ գործադիրի ղեկավար, որը պետք է աչքի ընկնի կանխատեսելիությամբ և հստակ ծրագրով»,–ասաց Շարմազանովը և հարցրեց, թե Ձեր ընտրվելու պարագայում ո՞վքեր են լինելու փոխվարչապետներն ու նախարարները` պատասխան չկա։
Նա հիշեցրեց, որ Փաշինյանը մի քանի ամիս առաջ պահանջում էր դուրս գալ ԵԱՏՄ–ից, իսկ այսօր ասում` իրողություն է փոխվել։
«Արցախյան հիմնահարցում որևէ հայեցակարգ չներկայացրեցիք` ո՞նց եք բանակցելու, ի՞նչ է լինելու 7 ազատագրված տարածքների ճակատագիրը։ Քաղաքական գործիչների համար ամենակարևորը գաղափարախոսությունն է։ Ես հույս ունեի լսել վարչապետի թեկնածուի հայեցակարգային ելույթ, բայց ականատես եղա ժողովրդի ականջը շոյող ելույթի»,–ասաց Շարմազանովը և հայտարարեց` ես չեմ տեսնում Ձեզ Գերագույն Գլխավոր հրամանատարի դերում։
Նա իր խոսքն ավարտեց հիշեցնելով ապրիլի 17–ի ելույթը`եթե ոմանց պետք են ուժեղ ցնցումներ, մեզ պետք է ուժեղ Հայաստան։