ԵՐԵՎԱՆ, 30 ապրիլի — Sputnik. Հայտնի շոումեն Գարիկ Մարտիրոսյանը Instagram–ի էջում շնորհավորել է Լոնդոնի «Արսենալի» կիսապաշտպան, Հայաստանի հավաքականի ավագ Հենրիխ Մխիթարյանին «Արսենալ – Մանչեսթեր Յունայթեդ» խաղից հետո։ Հեռուստաաստղը նշել է, որ առաջին անգամ է ուրախանում ՄՅՈՒ–ի դարպասին հասցված հարվածի համար։
«Կյանքում առաջին անգամ եմ ուրախանում, որ ՄՅՈւ–ի դարպասին հարված են հասցրել։ Շնորհավորում եմ, Հենրի՛խ», – գրել է հումորիստը։
Միկին էլ իր հերթին շնորհավորել է «Մանչեսթեր Յունայթեդի» երկրպագուներին` իրենց սիրելի թիմի հաղթանակի առթիվ։
Հիշեցնենք` ապրիլի 29–ի երեկոյան «Օլդ Տրաֆորդ» մարզադաշտում «Արսենալը» 2:1 հաշվով զիջել է «մանկունիանցին»։ Առաջին գոլը խփել են «մանկունիանցիները»` 16–րդ րոպեին Պոլ Պոգբան գրավել է դարպասը։ Պատասխան գոլի հեղինակ դարձել է Հայաստանի հավաքականի ավագ Հենրիխ Մխիթարյանը։ Նա հավասարեցրել է հաշիվը խաղի 51–րդ րոպեին։ Սակայն 90–րդ րոպեին Մարուան Ֆելաինին «կորզել» է հաղթանակը։
Մխիթարյանը մեկնարկային կազմում էր դուրս եկել, սակայն 76–րդ րոպեին «Արսենալի» մարզիչ Արսեն Վենգերը փոխարինեց հայ ֆուտբոլիստին։
Խաղի արդյունքներով երկու թիմն էլ պահպանեցին իրենց դիրքերը մրցաշարային աղյուսակում։ «Մանչեսթեր Յունայթեդը» երկրորդ է, իսկ «Արսենալը»` վեցերորդը։