ԵՐԵՎԱՆ, 29 ապրիլի — Sputnik. Իսրայելի միակ հետաքրքրությունն այն է, որ Հայաստանի տարածքն Իրանի դեմ որպես պլացդարմ օգտագործի, Sputnik Արմենիային ասաց քաղաքագետ Սերգեյ Շաքարյանցը։
«90-ականներին ես զրուցել եմ իսրայելական դիվանագիտական հանրության ներկայացուցչի հետ։ Մենք ինքներս ենք լսել նրա խոստովանությունն այն մասին, որ Հայաստանը նրանց ոչնչով հետաքրքիր չէ, նրանց ավելի շատ հետաքրքրում են Վրաստանն ու Ադրբեջանը», — ասաց Շաքարյանցը։
Քաղաքագետի խոսքով` Իսրայելը կարող է Հայաստանով հետաքրքրվել միայն որպես պլացդարմ սեփական հետախուզական ծառայությունների համար` Իրանի դեմ պայքարը հետագայում ակտիվացնելու համար։
Այդ դեպքում վտանգի տակ կհայտնվի Հայաստանի անվտանգությունը, քանի որ Իրանը չի պարզելու, թե որտեղից է գալիս վտանգը։ Պատասխան միջոցներն անխուսափելի են լինելու։
Նա ընդգծեց, որ Հայաստանը չի կարող Իրանի և Իսրայելի հարաբերությունների բարելավման հարթակ դառնալ։
«Նման որոշումները կախված են միայն Իրանի գերագույն առաջնորդ Այաթոլա Հոմեյնիից։ Դրա համար մի շարք այլ հարթակներ կան, որտեղ նրանք առանց այն էլ շփվում են», — ասաց Շաքարյանցը։
Հիշեցնենք, որ հայ-իսրայելական հարաբերությունները վերջին ժամանակաշրջանում ակտիվացել են բարեկամության միջխորհրդարանական խմբի, ինչպես նաև չքաղաքականացված հասարակական պլատֆորմի` «Հայաստան-Իսրայել» ֆորումի շնորհիվ։
Կարճ ժամանակի ընթացքում հաջողվել է ուղիղ չվերթեր գործարկել երկու երկրների միջև, իշխող կառույցների ներկայացուցիչների միջև էլ շփում է հաստատվել։