Սկզբունքային մրցակիցների մրցավեճը հետաքրքիր ինտրիգ ուներ` կապված ոչ միայն այս խաղի հետ, այլ նաև շատ այլ գործոնների: «Մանչեսթեր Յունայթեդն» ու «Արսենալը» կարելի է ասել, որ ձախողել են այս մրցաշրջանը, բայց երկու թիմերն էլ դեռևս կարող են տիտղոս նվաճել:
Կարծում եմ` հայ ֆուտբոլասերի համար շատ հետաքրքիր էր, թե ինչպես կդիմավորի «Օլդ Տրաֆորդը» հայ կիսապաշտպանին, որը հեռացել էր «Մանչեսթերից» ընդամենը երեք ամիս առաջ: Այդ առումով Մխիթարյանը որևիցե խնդիր չունեցավ: Հենրիխին «Մանչեսթերում» սիրում և հարգում են: Ու նույնիսկ նրա խփած գնդակից հետո հայ ֆուտբոլիստին ուղղված սուլոցներ չհնչեցին:
Շատ հետաքրքիր հակամարտություն էր սպասվում մրցակից կողմերի 7 համարի մարզաշապիկը կրող ֆուտբոլիստների միջև: Չէ՞ որ «Արսենալից» էլ հակառակ ուղղությամբ տրանսֆեր իրականացրեց Ալեքսիս Սանչեսը, որը երկար ժամանակ զինագործների առաջատարն էր համարվում: Ինչ-որ կոնկրետ պայքար երկու ֆուտբոլիստների միջև, իհարկե, սպասել պետք չէր: Բայց, անկասկած, ոմանք խաղից հետո քննարկելու են Մխիթարյանի ու Սանչեսի գործողությունները` համեմատելով ֆուտբոլիստների ցույց տված խաղը:
Նախևառաջ Մխիթարյանը միանշանակ լավ մարզավիճակում չէր կարող լինել, որովհետև մոտ մեկ ամիս շարքից դուրս էր մնացել ԲԿՄԱ-ի խաղից հետո: Իսկ Սանչեսը հակառակը` մասնակցել էր «Մանչեսթեր Յունայթեդի» բոլոր խաղերին: Բացի այդ էլ «Արսենալը» մրցակցի հարկի տակ խաղերում այս մրցաշրջանում, մեղմ ասած, վատ է խաղում: Սակայն Հենրիխը վատ խաղ չանցկացրեց: Հայ ֆուտբոլիստն իր վարպետության ու փորձի շնորհիվ շատ լավ համագործակցում էր իր խաղընկերների հետ ու հանդիպման 51-րդ րոպեին էլ դարձավ պատասխան գոլի հեղինակը` դիպուկ հարվածով գրավելով աշխարհի լավագույն դարպասապահներից մեկի՝ Դավիդ Դե Խեայի դարպասը:
Հենրիխը խաղադաշտում անցկացրեց 75 րոպե և նրա գործողությունները այս ժամանակահատվածում միանշանակ մեծ օգուտ բերեցին «Արսենալին»: Իսկ Մեսութ Օզիլի բացակայության պայմաններում Մխիթարյանի խաղը, բնականաբար, հույժ կարևոր էր զինագործների համար: Բացի այդ էլ Արսեն Վենգերն իր թիմին նախապատրաստում է Եվրոպայի լիգայի շրջանակում «Աթլետիկոյի» հետ պատասխան խաղին, այնպես որ թեկուզ և սկզբունքային խաղ էր, բայց ավելի կարևոր խաղ «Արսենալին» սպասվում է մայիսի 3-ին: Ու այդ խաղի արդյունքից է կախված` արդյո՞ք «Արսենալը» կկարողանա տիտղոս նվաճել այս մրցաշրջանում, որը, ինչպես գիտեք, վերջինն է լինելու մարզիչ Արսեն Վենգերի համար:
Ժոզե Մոուրինյոյի համար էլ այս խաղը ամենակարևորը չէր: Դժվար թե «Մանչեսթեր Յունայթեդը» դուրս մնա անգլիական Պրեմիեր լիգայի լավագույն քառյակից, ինչը հնարավորություն է տալիս հանդես գալու Չեմպիոնների լիգայի հաջորդ խաղարկությունում («Արսենալը» կորցրել է նման հնարավորությունը, եթե չհաղթի Եվրոպայի լիգայի խաղարկությունում): Միակ տիտղոսը, որը կարող է նվաճել «Մանչեսթեր Յունայթեդը», Անգլիայի գավաթն է, որի խաղարկության եզրափակիչում մանկունյանցիները մրցելու են «Չելսիի» հետ:
Որպես հետգրում նշենք, որ Հենրիխ Մխիթարյանի խփած գնդակը իր նախկին թիմի դարպասը օգուտ չբերեց «Արսենալին», քանի որ ավելացված ժամանակի առաջին րոպեին Մառուան Ֆելաինին հաղթանակ բերեց Մոուրինյոյի թիմին 2:1 հաշվով: Իսկ մեզ համար կարևորը Մխիթարյանի արդյունավետ վերադարձն էր։ Հուսով ենք, որ հայ ֆուտբոլիստի հաջողությունը շարունակություն կունենա: