ԵՐԵՎԱՆ, 27 ապրիլի — Sputnik. Հայտնի ռուս հեռուստահաղորդավար Վլադիմիր Սոլովյովը մեկնաբանել է Հայաստանում ընթացող բողոքի ակցիաները, մասնավորապես, ուշադրություն դարձնելով այն հանգամանքին, որ ցուցարարները որևէ աշխարհաքաղաքական կարգախոս և առաջնահերթություն չեն հնչեցնում։
«Վեստի ՖՄ»–ի եթերում Սոլովյովը նշել է, որ ցուցարարները, համենայնդեպս, ներկա փուլում, Ռուսաստանի մասին որևէ բացասական բան չեն խոսում, հայտարարություն չկա նաև Գյումրիից ռուսական ռազմաբազան հանելու անհրաժեշտության մասին։
Նրա խոսքով` Հայաստանն աշխարհաքաղաքական տեսանկյունից գտնվում է շատ բարդ շրջապատման մեջ։ Կա Վրաստանը, որի հետ հարաբերությունների տարբեր աստիճաններ կան, կա Իրանը, իսկ Հայաստանում ԱՄՆ–ի ազդեցության ուժեղացումը հազիվ թե ուրախացնի Իրանին։ Իսկ Թեհրանի դերը Հայաստանի համար շատ կարևոր է։
«Սակայն կա նաև Թուրքիա կոչվող երկիրը։ Թուրքիայից Հայաստանը բաժանում է ռուսական սահմանապահ ջոկատը։ Ո՞վ կարող է բացառել այդ սահմանին հարաբերությունների սրացումը։ Էլ չեմ խոսում Արցախի մասին», – ասում է Սոլովյովը։
Նա համոզված է` Գյումրիում ռուսական ռազմաբազայի մշտական ներկայությունը տարածաշրջանում գոնե ինչ-որ կայունություն են մտցնում։
Հեռուստահաղորդավարի խոսքով` Հայաստանում իրավիճակը խաղաղ է, համեմատաբար` վերահսկվող։ Գործընթացը կարգավորող մարդկանցից առավելագույն իմաստություն է պահանջվում։
«Հայաստանը շատ բարդ երկիր է։ Նա ծանր պատմական փորձ ունի` լի արցունքներով։ Հայաստանի պատմությունից կսկսեն լալ քարերը։ Հայերը շատ էմոցիոնալ ժողովուրդ են, շատ ազատասեր, յուրաքանչյուր հայ` գեներալ է, վարչապետ կամ նախագահ, վառ ու խելացի։ Այդ ամենն այդպես է», – ասել է Սոլովյովը։
Հայաստանում, նրա խոսքով, պարբերաբար շատ բարդ քաղաքական գործընթացներ են տեղի ունենում, շատ զգացմունքային։ Շատ արյուն է թափվել, բավական է հիշել միայն 1999 թվականը, երբ ներխուժեցին և գնդակահարեցին խորհրդարանի պատգամավորներին։
«Հայերը միշտ շատ էմոցիոնալ են ընկալում ցանկացած ընտրություն և շատ ակտիվ են արտահայտում իրենց դիրքորոշումը` փողոց դուրս գալով։ Սա առանձնահատկություն է», – ասել է Սոլովյովը։
Այժմ, բարեբախտաբար, խաղաղ, առանց արյուն թափելու գործընթաց է ընթանում։ Սոլովյովի խոսքով` շատ կարևոր է, որ գրեթե բոլոր մասնակիցները խոսում են դա իրավական դաշտում մնալու մասին։
«Եթե նրանք որոշել են, որ խորհրդարանական հանրապետություն են, ապա պետք է խաղալ այն նոր կանոններով, որոնք ընդունել են իրենց նոր Սահմանադրությամբ», – նշել է Սոլովյովը։
Նոր վարչապետին պետք է ընտրի խորհրդարանը, և այժմ, հեռուսատահաղորդավարի խոսքով, բարդ, սակայն Հայաստանի համար բավական սովորական քաղաքական խաղ է գնում։
ՀՀ վարչապետի ընտրության հարցը քննարկվելու է և քվեարկվելու է արդեն մայիսի 1-ին։
Հիշեցնենք, որ Երևանում 10 օր տևած բողոքի ակցիաներից հետո, որը կազմակերպել էր «Իմ քայլը» նախաձեռնությունը, ապրիլի 23-ին ՀՀ վարչապետ Սերժ Սարգսյանը հրաժարական տվեց։ Օրեր շարունակ տասնյակ հազարավոր մարդիկ ցույցերի էին դուրս եկել` բողոքելով Սերժ Սարգսյանի իշխանության երկարացման դեմ (2008 թվականից նա ղեկավարում էր երկիրը, որպես նախագահ, իսկ ապրիլի 17-ին խորհրդարանն ընտրել էր նրան որպես վարչապետ ու պետության փաստացի ղեկավար)։
ՀՀ վարչապետ Սերժ Սարգսյանի հրաժարականից հետո ՀՀ նախագահ Արմեն Սարգսյանն ընդունեց նաև կառավարության հրաժարականը։
Դրանից հետո «Իմ քայլը» նախաձեռնությունը` ղեկավար Նիկոլ Փաշինյանի գլխավորությամբ, շարունակում է պայքարել իշխող ՀՀԿ–ի դեմ, որպեսզի նրանք վարչապետի պաշտոնում առաջ չմղեն իրենց թեկնածուին։