ԵՐԵՎԱՆ, 27 ապրիլի — Sputnik. ՀՀ հատուկ քննչական ծառայության քննիչի վարույթ է ընդունվել մաքսային տեսուչների կողմից պաշտոնեական դիրքը չարաշահելու դեպքերի առթիվ ՀՀ ԿԱ պետական եկամուտների կոմիտեի քննչական վարչությունում հարուցված քրեական գործը:
Այս մասին տեղեկացնում են ՀՀ հատուկ քննչական ծառայության մամուլի վարչությունից։
Քրեական գործի նյութերի ուսումնասիրությամբ պարզվել է, որ նախորդ տարվա օգոստոսի 1-ին Արարատի մարզի բնակիչ Ա. Գ.-ն իր բեռանատար ավտոմեքենայով Բագրատաշենի մաքսակետով արտահանել է ավելի քան 16 տոննա միրգ, ձկնեղեն ու խեցգետին որսալու սարքավորումներ: Սակայն մինչև արտահանումը Ա. Գ.-ն հայտարարագրել է միայն միրգը, իսկ մնացած ապրանքների վերաբերյալ հայտարարագրում որևէ նշումներ չի կատարել` նպատակ ունենալով դրանք արտահանել քողարկված եղանակով:
Բագրատաշենի մաքսակետում հսկողություն իրականացնող մաքսային տեսուչներն էլ, ստանալով արտահանման ենթակա հայտարարագրված ապրանքների վերաբերյալ փաստաթղթերը, թույլ են տվել նշված ավտոմեքենայի բացթողումը մաքսային կետից` առանց դրանում առկա բեռը զննելու: Հետագայում Վրաստանի համապատասխան ծառայությունների կողմից հայտնաբերվել են Ա. Գ.-ի կողմից չհայտարարագրված եղանակով արտահանված ապրանքները, ինչի արդյունքում արգելվել է դրանց բեռնափոխադրումը:
Դրանից հետո Բագրատաշենի մաքսակետի տեսուչների կողմից կազմվել է մաքսային կանոնների խախտման վերաբերյալ արձանագրություն, սակայն չհայտարարագրված եղանակով ՀՀ-ից արտահանված բեռը որևէ անձի կամ կազմակերպությանը սահմանված կարգով ի պահ հանձնելու փոխարեն մաքսային տերմինալին ի պահ է տրվել միայն դատարկ բեռնատար ավտոմեքենան: ՊԵԿ աշխատակիցների ուղեկցությամբ հիշյալ ավտոմեքենան Գեղարքունիքի մարզ տեղափոխելու ճանապարհին մի շարք անձինք կազմակերպել են դրա բեռնաթափումն ու ապրանքների տնօրինումը, իսկ ավտոմեքենան հետագայում դատարկ վիճակում ի պահ է հանձնվել մաքսային տերմինալին:
Հաշվի առնելով, որ հիշյալ քրեական գործի նյութերում առկա են ՀՀ ԿԱ ՊԵԿ պաշտոնատար անձանց կողմից պաշտոնեական լիազորությունները չարաշահելու առերևույթ հանցագործությունների հատկանիշներ, այն քննչական ենթակայության կարգով ընդունվել է ՀՀ հատուկ քննչական ծառայության վարույթ` հետագա նախաքննությունը շարունակելու համար: