ԵՐԵՎԱՆ, 26 ապրիլի — Sputnik. ՀՀ արտակարգ իրավիճակների նախարարի ժամանակավոր պաշտոնակատար Դավիթ Տոնոյանն այսօր պատասխանելով լրագրողների հարցերին` չի հերքել, որ վերջին օրերին հանդիպել ու զրուցել է ընդդիմության ներկայացուցիչների հետ, բայց իրեն առաջարկվող պաշտոնի մասին չեն խոսել։
«Ստեղծված արտակարգ քաղաքական իրավիճակում իմ ամենօրյա և՛ հեռախոսային շփումները, և՛ անձնական հանդիպումները «Ելք» խմբակցության ներկայացուցիչների հետ կապված են բացարձակապես հանրային անվտանգության ապահովման օրհասականությամբ»,- ասաց Տոնոյանը:
Նա նաև հայտնեց, որ չի պատրաստվում արձագանքել որևիցե պաշտոնի առաջարկի, իսկ ԱԻ նախարարի պարտականությունները շարունակելու է իրականացնել այնքան ժամանակ, քանի դեռ ՀՀ նախագահը չի ազատել պարտականությունների կատարումից։
Հիշեցնենք, որ «Ելք» խմբակցության պատգամավոր Արարատ Միրզոյանն այսօր իր ֆեյսբուքյան էջում գրառում է հրապարակել` նշելով, որ Դավիթ Տոնոյանը պաշտպանության նախարարի հիանալի թեկնածու է:
Ապրիլի 24-ի երեկոյան չեղյալ հայտարարվեց վարչապետի պաշտոնակատար Կարեն Կարապետյանի և «Ելք» դաշինքնի առաջնորդ Նիկոլ Փաշինյանի հանդիպումը, որի ընթացքում պետք է քննարկվեին հետագա անելիքները։ Կարեն Կարապետյանի խոսքով`Փաշինյանի վերջնագիրը նշանակում է, որ ոչ թե երկխոսություն պիտի կայանա, այլ Փաշինյանը ուզում է բացառապես հնչեցնել սեփական տեսակետը` ընդհուպ դիմացի կողմի բանակցողներին որոշելով։
Երևանում 10 օր տևած բողոքի ակցիաներից հետո ապրիլի 23-ին ՀՀ վարչապետ Սերժ Սարգսյանը հրաժարական տվեց։ Օրեր շարունակ տասնյակ հազարավոր մարդիկ ցույցերի էին դուրս եկել` բողոքելով Սերժ Սարգսյանի իշխանության երկարացման դեմ (2008 թվականից նա ղեկավարում էր երկիրը որպես նախագահ, իսկ ապրիլի 17-ին խորհրդարանն ընտրել էր նրան որպես վարչապետ ու պետության փաստացի ղեկավար)։
ՀՀ վարչապետ Սերժ Սարգսյանի հրաժարականից հետո ՀՀ նախագահ Արմեն Սարգսյանն ընդունեց նաև կառավարության հրաժարականը։ Այս պահին կառավարության ղեկավարի պարտականություններն իրականացնում է Կարեն Կարապետյանը։