ԵՐԵՎԱՆ, 26 ապրիլի — Sputnik. Անցած գիշեր կատարած ծառայության ընթացքում Ճանապարհային ոստիկանությունը մայրաքաղաքում հայտնաբերել և հատուկ պահպանվող տարածք է տեղափոխել առանց հաշվառման համարանիշերի երթևեկող 18 ավտոմեքենա, որոնց վարորդների նկատմամբ կազմվել է վարչական իրավախախտման վերաբերյալ արձանագրություն։ Այս մասին հայտնում է Ոստիկանության հասարակայնության հետ կապերի բաժնի պետ Աշոտ Ահարոնյանը։
Նրա խոսքով` միջոցառումները շարունակվում են։ Ոստիկանությունը վարորդներին կոչ է անում պահպանել երթևեկության կանոնները։
Նշենք, որ պետհամարանիշները փակելու համար սահմանված տուգանքը 200 հազար դրամ է կազմում։
«Ելք» խմբակցության ղեկավար, «Իմ քայլը» շարժման առաջնորդ Նիկոլ Փաշինյանին նույնպես մտահոգել է այս հարցը։ Նա խոստացել է լրջորեն զբաղվել համարանիշները փակած ավտոմեքենաների վարորդների հարցով։