ԵՐԵՎԱՆ, 26 ապրիլի — Sputnik. Հայաստանի Հանրապետության նախագահ Արմեն Սարգսյանը, ապրիլի 25-ի ողջ օրվա ընթացքում խորհրդակցություններ անցկացնելով քաղաքական ուժերի և հասարակական-քաղաքական գործիչների հետ` ապրիլի 26-ին առավոտյան հանդես է եկել ուղերձով:
«Մեր երկրում վերջին օրերի բուռն զարգացումներն աննախադեպ երևույթ են: Այն, թե ինչպես քաղաքացիական շարժումը կազմակերպված և քաղաքակիրթ զարգացման ճանապարհով վերաճեց համաժողովրդական շարժման, համայն հայության համար հպարտության առարկա է»,- նշել է Սարգսյանը:
ՀՀ նախագաի խոսքով` Հայաստանի պատմության մեջ ունենք նոր էջ, և մենք ապրում ենք Նոր Հայաստանում:
«Հայաստան, որտեղ յուրաքանչյուր հայաստանցի և աշխարհասփյուռ հայությունն իր ուժն ու եռանդը պետք է դնի երկրի զարգացման համար: Հայաստան, որին մատնացույց են անելու աշխարհում՝ ժողովրդավարության, կառավարման, քաղաքացիական հասարակության, մշակույթի, գիտության ու տնտեսության զարգացման առումով: Հայաստան, որտեղ հայը տեսնելու է իր և իր սերունդների ապագան: Հայաստան, որը սիրելու է յուրաքանչյուր հայ՝ պետական այրն ու շարքային քաղաքացին»,- ասել է Սարգսյանը:
Նա ընդգշել է, որ այս իրողությունը ժխտելը քաղաքական կարճատեսություն կլինի:
«Այնպես, ինչպես Սերժ Սարգսյանը սթափ գնահատականով բացեց Նոր Հայաստան տանող դարպասը, նույն կերպ քաղաքական բոլոր ուժերը, հատկապես՝ Ազգային ժողովում ներկայացված, պետք է համերաշխաբար հարթեն այդ ճանապարհը՝ առաջնորդվելով Սահմանադրությամբ»,- նշված է ուղերջում:
Սարգսյանն ընդգծել է, որ բոլոր պարտավոր են հավուր պատշաճի իրագործել այն պատմական առաքելությունը, որը բաժին է հասել, և մեր ազգի համար այս բախտորոշ պահին անել այդ քայլը: Ժողովրդի մեծամասնության վստահությունը վայելող քաղաքական ուժերը պետք է միասնաբար երկիրն առաջնորդեն այս ճանապարհով:
«Ես համոզված եմ, որ հազարամյակների ընթացքում կուտակված ազգային խոհեմությունը թույլ չի տա բաց թողնել այս պատմական պահը»,- ասել է Սարգսյանը:
ՀՀ նախագահը հպարտ է, որ տեսնում է այօրվա Հայաստանը, և ուրախ է, որ ապրելու է վաղվա հզոր, միասնական, արդար և ծաղկող Հայաստանում: