ԵՐԵՎԱՆ, 24 ապրիլի — Sputnik. Երկրի ներքաղաքական փոփոխությունները դրական կանդրադառնան Հայաստանի հեղինակության վրա։ Այսօր Ծիծեռնակաբերդում այս մասին լրագրողներին ասաց ՀՀ փոխարտգործնախարար Շավարշ Քոչարյանը։
«Կարծում եմ, որ ամբողջ աշխարհը համոզվեց, որ որոշիչ հարցերում մենք միասնական ենք», — ասաց Քոչարյանը։
Նրա խոսքով` երկրում տեղի ունեցած փոփոխությունները պետք է դրական ազդեցություն ունենան նաև Հայաստանի միջազգային հեղինակության վրա։
Հիշեցնենք` Երևանում 10 օր տևած բողոքի ակցիաներից հետո երեկ` ապրիլի 23-ին, ՀՀ վարչապետ Սերժ Սարգսյանը հրաժարական տվեց։ Օրեր շարունակ տասնյակ հազարավոր մարդիկ ցույցերի էին դուրս եկել` բողոքելով Սերժ Սարգսյանի իշխանության երկարացման դեմ (2008 թվականից նա ղեկավարում էր երկիրը որպես նախագահ, իսկ ապրիլի 17-ին խորհրդարանն ընտրել էր նրան որպես վարչապետ ու պետության փաստացի ղեկավար)։
ՀՀ վարչապետ Սերժ Սարգսյանի հրաժարականից հետո ՀՀ նախագահ Արմեն Սարգսյանն ընդունեց նաև կառավարության հրաժարականը։ Այս պահին կառավարության ղեկավարի պարտականություններն իրականացնում է Կարեն Կարապետյանը։ Նախարարները շարունակում են աշխատել ժամանակավոր պաշտոնակատարների կարգավիճակով։ Նոր վարչապետի ընտրություններն ԱԺ-ում նախատեսվում են հաջորդ շաբաթ։