ԵՐԵՎԱՆ, 24 ապրիլի — Sputnik. Մեր երկիրն ամեն ինչ արեց բռնությունից խուսափելու համար, ասել է ՀՀ վարչապետի պաշտոնակատար Կարեն Կարապետյանը Հայաստանի Հանրապետությունում հավատարմագրված դեսպանների և դիվանագիտական կարգավիճակ ունեցող միջազգային կազմակերպությունների ղեկավարների հետ հանդիպման ժամանակ։
«Կարծում եմ՝ տեղյակ եք` առաջիկայում պարոն Նիկոլ Փաշինյանի հետ տեղի կունենան բանակցություններ, որոնց ընթացքում կփորձենք լուծումներ գտնել: Օրակարգը բաց է, և ինչպես ենթադրում են բանակցությունները, յուրաքանչյուր կողմ կարող է իր առաջարկություններով հանդես գալ»,- ասել է Կարապետյանը:
Նա շեշտել է, որ բոլոր լուծումները պետք է լինեն քաղաքակիրթ և տրամաբանական, Սահմանադրության և օրենքների շրջանակներում։
«Վստահեցնում եմ, որ կանեմ հնարավորը մեր ժողովրդի համերաշխությունը և համախմբվածությունը ապահովելու համար և չեմ թաքցնում` նույնը ակնկալում եմ նաև մեր գործընկերներից»,- ասել է Կարապետյանը:
Վարչապետի պաշտոնակատարն արձանագրել է, որ մեր երկիրն ամեն ինչ արեց բռնությունից խուսափելու և ազգային համերաշխության մթնոլորտ ստեղծելու, հասարակական կյանքը բնականոն հուն վերադարձնելու համար, ինչը վկայում է Հայաստանում ժողովրդավարության հասունության և պետական մտածողության մասին:
Կարապետյանի կարծիքով` Հայաստանն աշխարհին հստակ ազդակ տվեց, որ ստեղծել է կայուն պետական ինստիտուտներ, ձևավորել ժողովրդավարություն, որն այսօր հաստատակամորեն առաջ է շարժվում:
Վաչապետի պաշտոնակատարն ընդգծել է նաև ոստիկանության և անվտանգության ուժերի դրսևորած բարձր պրոֆեսիոնալիզմը, հանդուրժողականությունը և անմնացորդ ծառայությունը մեր երկրին, ինչպես նաև մեր պայծառ երիտասարդության դերակատարումը:
«Հենց այդ երիտասարդությունն է մեր ապագան, և հենց նրանք են հանդիսանալու կայուն հենարան մեր երազած Հայաստանը կերտելու գործում»,- ասել է նա:
Կարապետյանի խոսքով` Հայաստանը շարունակելու է հավատարիմ մնալ իր ստանձնած միջազգային բոլոր պարտավորություններին և հանձնառություններին:
Պետական բոլոր հաստատություններն անխափան շարունակելու են իրենց աշխատանքը՝ ապահովելու Հայաստանի քաղաքացիների և հյուրերի անվտանգությունը, բնականոն կյանքը, ինչը մեր պետականության հասունության կարևորագույն ցուցանիշն է:
Հայաստանի Հանրապետության զինված ուժերը շարունակելու են ամուր պահել երկրի սահմանները, ինչպես նաև երաշխավորել Արցախի և նրա ժողովրդի անվտանգությունը:
Նշենք, որ Նիկոլ Փաշինյանի և Կարեն Կարապետյանի բանակցությունները նախատեսված են վաղը` ապրիլի 25-ին, ժամը 11։00-ին «Մարիոթ» հյուրանոցում։