ԱԺ փոխխոսնակ Էդուարդ Շարմազանովը հաստատեց, որ ապրիլի 25-ին ընդդիմության հետ բանակցություններ կանցկացվեն։ Այս մասին նա լրագրողներին ասաց Ծիծեռնակաբերդում։
«Ընդդիմության հետ բանակցությունները վաղն են սկսվելու, և այդ մասին արդեն հայտնել էին», — պարզաբանեց Շարմազանովը` ավելացնելով, որ Հայաստանի ներքաղաքական կյանքի վերջին աղմկահարույց իրադարձությունները քննարկել չի ցանկանում։
Հիշեցնենք, որ երեկ` ապրիլի 23-ին, զանգվածային հասարակական բողոքի ցույցերից հետո ՀՀ վարչապետ Սերժ Սարգսյանը հրաժարական տվեց։ Ավելի ուշ հրաժարական տվեց նաև կառավարությունը։ Վարչապետի լիազորությունները ժամանակավորապես ստանձնեց առաջին փոխվարչապետ Կարեն Կարապետյանը, որը վարչապետի պաշտոնը զբաղեցնում էր 2016 թվականի սեպտեմբերից մինչև 2018 թվականի ապրիլի 9-ը։
«Այսօր ապրիլի 24-ն է` հիշատակի, XX դարի մեծ ողբերգության օր», — ասաց Շարմազանովը։
1915 թվականին տեղի ունեցած ոճրագործությունը, որի հետևանքով Օսմանյան կայսրությունում ավելի քան 1.5 մլն հայ է սպանվել, ХХ դարի առաջին ցեղասպանությունն է համարվում։ Թուրքիան ավանդաբար մերժում է ցեղասպանություն իրագործելու մեղադրանքներն ու անչափ ցավագին է ընդունում այդ հարցի վերաբերյալ քննադատությունները։
Հայոց ցեղասպանությունն առաջինը ճանաչել է Ուրուգվայը 1965 թվականին, այնուհետև նրա օրինակին են հետևել Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, Բրազիլիան, Չիլին, Վատիկանը, Բոլիվիան, Չեխիան, Ավստրիան, Լյուքսեմբուրգը։ ԱՄՆ 50 նահանգներից 45-ը պաշտոնապես ճանաչել և դատապարտել են Հայոց ցեղասպանությունը, ինչպես նաև ապրիլի 24-ը հայտարարել Հայոց ցեղասպանության զոհերի հիշատակի օր։