ԵՐԵՎԱՆ, 23 ապրիլի — Sputnik. Տարածաշրջանում տեղի ունեցած վերջին քաղաքական զարգացումների և շփման գծում լարվածության հնարավոր աճի համատեքստում ԵԱՀԿ Մինսկի խմբի համանախագահներն այսօր հատուկ հայտարարություն են տարածել՝ ընդգծելով այս «զգայուն ժամանակաշրջանում հրադադարի ռեժիմին հավատարիմ մնալու, մասնավորապես ծանր զրահատեխնիկան առաջնագծից հետ քաշելու ծայրահեղ անհրաժեշտությունը»:
Համանախագահներ Իգոր Պոպովը (Ռուսաստան), Ստեֆան Վիսկոնտին (Ֆրանսիա) և Էնդրյու Շեֆերը (ԱՄՆ) կողմերին կոչ են արել անհապաղ քայլեր ձեռնարկել լարվածությունը թուլացնելու ուղղությամբ։
«Ակնկալում ենք կողմերի հետ հնարավորինս շուտ հանդիպում ունենալ և վերականգնել ակտիվացած բանակցությունները՝ հակամարտության երկարատև ու խաղաղ կարգավորումը գտնելու համար»,- նշված է հայտարարության մեջ:
Նշենք, որ Արցախի պաշտպանության նախարարության հայտարարության համաձայն` առաջնային գծի տարբեր հատվածներում ադրբեջանական զինուժի կուտակումներ ու տեղաշարժեր են արձանագրվել։