ԵՐԵՎԱՆ, 22 ապրիլի — Sputnik. ՀՀ ոստիկանները շրջափակել են Շենգավիթի ոստիկանության բաժանմունքը, որտեղ ենթադրաբար բերման են ենթարկվել ԱԺ «ԵԼՔ» խմբակցության պատգամավորներ Նիկոլ Փաշինյանը, Արարատ Միրզոյանը և Սասուն Միքայելյանը:
Թեև ոստիկանությունը պաշտոնապես որևէ տեղեկություն չի տալիս նրանց գտնվելու մասին, բայց Միրզոյանի և Միքայելյանի հարազատները լրագրողներին հայտնել էին, որ նրանք պահվում են հենց այս բաժանմունքում:
Նիկոլ Փաշինյանի գտնվելու վայրի մասին տեղյակ չէ նաև նրա կինը՝ լրագրող Աննա Հակոբյանը։ Նա այս մասին հայտնել էր լրագրողներին:
Ոստիկանության բաժանմունքի մոտ մեծ թվով քաղաքացիներ են հավաքվել՝ իրենց զորակցությունը հայտնելու պատգամավորներին: Քաղաքացիների ձեռքում ցուցանակներ կան «Ես Նիկոլն եմ» գրություններով:
Ոստիկանության աշխատակիցներին հաջողվեց հրելով հեռացնել քաղաքացիներին ոստիկանության մուտքից: Ցուցարարներն այս պահին հավաքված են Գարեգին Նժդեհի փողոցում: Ոստիկանության բաժանմունքից նրանց բաժանում է ոստիկանության մի քանի շարքից բաղկացած կենդանի պատը:
Նշենք, որ ՀՀ ԳԴ-ն արդեն պաշտոնապես հայտարարել է, որ պատգամավորներ Նիկոլ Փաշինյանը, Արարատ Միրզոյանը և Սասուն Միքայելյանը ձերբակալված են: