ԵՐԵՎԱՆ, 21 ապրիլի — Sputnik. Երևանի կենտրոնում երթևեկությունը դադարեցվել է։ Փակ են Մաշտոցի պողոտան, Պուշկին, Թումանյան, Խորենացի, Ամիրյան, Մոսկովյան և Իսահակյան փողոցները։
«Ցուցարարներին է հասնում մի քանի հարյուր մարդուց բաղկացած նոր խումբը», — հայտնում է Sputnik Արմենիայի թղթակիցը դեպքի վայրից։
Այստեղ ոստիկանական ուժեր և ցուցարարներ են կենտրոնացել։ Ճանապարհը փակում են նաև ավտոմեքենաները, վարորդներից մի քանիսը դուրս են գալիս և փակում մեքենաները` խցանումներ ստեղծելով։
Ավելի վաղ ոստիկանները փակել էին դեպի ԱԺ տանող քաղաքի գլխավոր փողոցը` Բաղրամյան պողոտան։
«Իմ քայլը» բողոքի շարժման առաջնորդ, պատգամավոր Նիկոլ Փաշինյանն իր հերթին ցուցարարների հիմնական խմբի հետ կենտրոն է շարժվում։
Առավոտվանից զանգվածային ցույցերը տեղափոխվել են Երևանի ծայրամաս, հավաքը սկսել է Նոր Նորքի 7-րդ զանգվածից։ Ավելի ուշ Փաշինյանը փոխեց գործողությունների ծրագիրը։ Ոստիկանության ճնշման տակ, որը ակցիան ապօրինի անվանեց, Փաշինյանը չեղյալ հայտարարեց առավոտվա հավաքը և տեղեկացրեց ոստիկանությանը նոր քայլերթի մեկնարկի մասին։ Քաղաքի տարբեր հատվածներում բնակիչները իրենց համերաշխությունն են հայտնում «Իմ քայլը» շարժման կազմակերպիչ, ընդդիմադիր պատգամավոր Նիկոլ Փաշինյանի հետ։
Ապրիլի 17-ին Ազգային ժողովում անցկացված քվեարկության ժամանակ ՀՀ վարչապետ ընտրվեց Սերժ Սարգսյանը։ «Ելք» խմբակցության ղեկավար Նիկոլ Փաշինյանն ու նրա կողմնակիցները դուրս են եկել Երևանի փողոցներ և բողոքում են այս ընտրության դեմ։
Փաշինյանը մարտի 31-ից Հայաստանի տարածքում նախաձեռնել է «Իմ քայլը» արշավը։ Մի քանի օրում Փաշինյանն իր համախոհների հետ ոտքով անցել է ավելի քան 200 կիլոմետր` ակցիաներ անցկացնելով Գյումրիում, Վանաձորում, Սպիտակում, Դիլիջանում, Աբովյանում և Հրազդանում։ Պատգամավորն ու նրա համախոհները բողոքում էին վարչապետի պաշտոնում Սերժ Սարգսյանի թեկնածության առաջադրման դեմ, սակայն նրանց բողոքը չխանգարեց, որ Ազգային ժողովը վարչապետ ընտրի հենց Սարգսյանին։ Երևանում քաղաքացիական անհնազանդության գործողությունները մեկնարկել են ապրիլի 16-ից։ Փաշինյանը հայտարարել է, որ թավշյա հեղափոխություն է իրականացնում։