ԵՐԵՎԱՆ, 21 ապրիլի — Sputnik. Աշխարհահռչակ շանսոնյե Շառլ Ազնավուրը ֆեյսբուքյան իր էջում Հայաստանում տեղի ունեցող իրադարձությունների վերաբերյալ հայտարարություն է տարածել ։
«Անգամ եթե աշխատանքային պարտավորությունների բերումով ես հեռու եմ գտնվում, սիրտս միշտ Հայաստանում է։ Ես շատ անհանգիստ եմ և մտահոգված Հայաստանում ստեղծված իրավիճակով»,- գրել է նա։
Ազնավուրը բոլոր կողմերին կոչ է արել հավաքվել քննարկումների սեղանի շուրջ՝ լուծում գտնելու և բռնությունից խուսափելու համար։ Ազնավուրը կողմերից յուրաքանչյուրին հորդորել է զիջումների գնալ` պահպանելով ազգի միասնությունը, հավատարիմ մնալով մարդասիրական ու ժողովրդավարական արժեքներին։
«Մեծագույն ցանկությունս է, որ հայ երիտասարդները գտնեն իրենց տեղը և կայանան զարգացած ու խաղաղ Հայաստանում»։
Նշենք, որ վերջին օրերին կայացած հանրահավաքներում մասնակիցները աշխարհահռչակ հայ գործիչներին, այդ թվում`Շառլ Ազնավուրին կոչ էին անում աջակցել իրենց շարժմանը։
Ապրիլի 17-ին Ազգային ժողովում անցկացված քվեարկության ժամանակ ՀՀ վարչապետ ընտրվեց Սերժ Սարգսյանը։ «Ելք» խմբակցության ղեկավար Նիկոլ Փաշինյանն ու նրա կողմնակիցները դուրս են եկել Երևանի փողոցներ և բողոքում են այս ընտրության դեմ։
Փաշինյանը մարտի 31-ից Հայաստանի տարածքում նախաձեռնել է «Իմ քայլը» արշավը։ Մի քանի օրում Փաշինյանն իր համախոհների հետ ոտքով անցել է ավելի քան 200 կիլոմետր` ակցիաներ անցկացնելով Գյումրիում, Վանաձորում, Սպիտակում, Դիլիջանում, Աբովյանում և Հրազդանում։ Պատգամավորն ու նրա համախոհները բողոքում էին վարչապետի պաշտոնում Սերժ Սարգսյանի թեկնածության առաջադրման դեմ, սակայն նրանց բողոքը չխանգարեց, որ Ազգային ժողովը վարչապետ ընտրի հենց Սարգսյանին։ Երևանում քաղաքացիական անհնազանդության գործողությունները մեկնարկել են ապրիլի 16-ից։ Փաշինյանը հայտարարել է, որ թավշյա հեղափոխություն է իրականացնում։