ԵՐԵՎԱՆ, 21 ապրիլի — Sputnik. ԱԺ նախկին պատգամավոր Առաքել Մովսիսյանը (հայտնի է Շմայս մականունով) Փարաքար գյուղի մոտ փակել է մարզերից Երևան եկող ցուցարարների ճանապարհը։
Նրա հրահանգով հսկա բեռնատար ավտոմեքենան կանգնել է Արգավանդի խճուղում` երկկողմանի արգելափակելով երթևեկությունը։
Ավելի ուշ տարածք եկան նաև այլ բեռնատարներ, որոնք նույնպես փակեցին դեպի Երևան բերող ճանապարհը։
Լրագրողների հարցին, թե որն է նպատակը, նախկին պատգամավորը պատասխանեց.«Մենք էլ են ուզում գնանք, չենք կարողանում»։
Երթի մասնակից բեռնատարի վարորդին Արգավանդում քաղաքացիական շորերով անձինք դուրս բերեցին ավտոմեքենայից, բռնի ուժով ու հայհոյելով տեղափոխեցին մասնավոր տարածք` խճուղուն կից առանձնատուն։
Քաղաքացու ճակատագիրն այս պահին հայտնի չէ։ Արգավանդի խճուղին բաց է միակողմանի` դեպի էջմիածին։
Հիշեցնենք, որ այսօր առավոտյան Էջմիածնում մեկնարկած հանրահավաքի մասնակիցները երթով շարժվում էին դեպի Երևան։