ԵՐԵՎԱՆ, 20 ապրիլի — Sputnik. Հայաստանը կարող է ավելի ամուր հաստատվել Ղազախստանի ոսկերչական շուկայում։ Այս մասին Sputnik Արմենիայի թղթակցին ասաց հայ ոսկերիչների ասոցիացիայի նախագահ Էմիլ Գրիգորյանը։
Ապրիլի 5-8-ը Ղազախստանում անցկացվել է«Aru Almaty» տարածաշրջանային ոսկերչական ցուցահանդեսը, որին մասնակցել է նաև Հայաստանի պատվիրակությունը։
Ցուցահանդեսում ստորագրվել են մի քանի նոր պայմանագրեր։ Հայկական տաղավարը հետաքրքրել է միջինասիական մեծածախ գնորդներին։
Ղազախստանցիներն առաջվա պես պատրաստ են ոսկերչական զարդեր գնել նույնիսկ 2015թ-ի տենգեի անկումից և 2014-2015թթ-ին նավթի գների նվազումից հետո։
«Մեր ոսկերիչներն իրենց վարպետությունը կարող են ցուցադրել ցանկացած շուկայում։ Միջին Ասիայի համար նրանք առաջարկում են զարդեր թե՛ ավանդական նախշերով, թե՛ եվրոպական դիզայնով, իսկ տեղի հայերի համար` ազգային նախշերով։ Չկա այնպիսի առաջադրանք, որը չկարողան լուծել վարպետները», — նշեց Գրիգորյանը։
Նշենք, որ Ղազախստանը խոշոր շուկա է հայ ոսկերիչների համար, բայց նրանց ներկայությունը համեմատաբար փոքր է։ 2016թ-ին Ղազախստանը ներկրել է 31 տոննա ոսկերչական արտադրանք, որի միայն 7 կգն է բաժին ընկել Հայաստանին։