ԵՐԵՎԱՆ, 19 ապրիլի — Sputnik. Մարդու իրավունքների պաշտպանի աշխատակազմի թեժ գծին ստացվել են ահազանգեր ոստիկանության կողմից այսօրվա հավաքի մասնակիցների բերման ենթարկելու մասին։
Այս մասին տեղեկացնում են ՀՀ ՄԻՊ մամուլի գրասենյակից։
Պաշտպանի հանձնարարությամբ աշխատակազմի արագ արձագանքման խմբերն այս պահի դրությամբ այցելել են Ոստիկանության Էրեբունու, Կենտրոնականի և Արաբկիրի բաժիններ։ Հատուկ ուշադրություն է դարձվում բերման ենթարկելու հիմքերին։
Նշենք, որ Երևանում հավաքներ նախաձեռնելու առաջին պահից սահմանվել է աշխատանքի արտակարգ գրաֆիկ, ստեղծվել են աշխատանքային խմբեր, որոնք, ըստ մասնագիտական ուղղությունների, իրականացնում են թե՛ հավաքների շուրջօրյա դիտարկում, թե՛ այցեր՝ կապված հավաքների մասնակիցներին ոստիկանության կողմից մեկուսացնելու փաստերի հետ, և թե՛ ԶԼՄ-ների հրապարակումների ու սոցիալական ցանցերի մշտադիտարկում:
Հիշեցնենք, որ արդեն 4–րդ օրն է մայրաքաղաք Երևանը փոթորկում է։ «Իմ քայլը» նախաձեռնությունը` «Ելք» դաշինքի պատգամավոր Նիկոլ Փաշինյանի գլխավորությամբ, բողոքի ակցիաներ է անցկացնում` ընդդեմ Սերժ Սարգսյանի վարչապետության։