ԵՐԵՎԱՆ, 18 ապրիլի — Sputnik. ՀՀ հատուկ քննչական ծառայությունը նոր քրեական գործեր է հարուցել «Իմ քայլը» նախաձեռնության կազմակերպած հավաքների մասնակիցների նկատմամբ։
Ինչպես հայտնում է հատուկ քննչական ծառայությունը, քրեական գործերից մեկի նյութերով 2018թ. ապրիլի 13-ին հավաքի մասնակիցները վնասելով Երևանի պետական համալսարանի մուտքի դռները, ներխուժել են համալսարանի շենք` այդ ընթացքում մարմնական վնասվածքներ պատճառելով համալսարանի անվտանգության աշխատակիցներին: Ապա, տևական ժամանակ գտնվելով շենքում, հավաքի մասնակիցները խախտել են ԲՈՒՀ-ի բնականոն գործունեությունը, որի հետևանքով վտանգվել է հասարակական անվտանգությունը:
Մեկ այլ քրեական գործի նյութերով`2018թ. ապրիլի 16-ին, ժամը 11:10-ի սահմաններում, Նիկոլ Փաշինյանի կազմակերպած հավաքի մասնակիցները, վնասելով Կորյուն 10 հասցեում գտնվող Երևանի բժշկական քոլեջի մուտքի դուռը, ներխուժել և տևական ժամանակ գտնվել են շենքում, խանգարել ուսումնական գործընթացը և խախտել քոլեջի բնականոն աշխատանքը:
Երրորդ քրեական գործի նյութերով էլ` 2018թ. ապրիլի 16-ին, ժամը 16:00-ի սահմաններում, հավաքի մասնակիցները Բաղրամյան պողոտայով շարժվել են դեպի ՀՀ ԱԺ վարչական շենք, որի ընթացքում քաշքշելու, հրելու և տարբեր իրեր նետելու միջոցով բռնություն են գործադրել ոստիկանության ծառայողների նկատմամբ` նրանց պատճառելով մարմնական վնասվածքներ: Հավաքի կազմակերպիչների և անօրինական գործողությունների հետևանքով խախտվել է հասարակական կարգն ու վտանգվել հասարակության անվտանգությունը:
Նախաքննությունը շարունակվում է։ Քրեական գործերում ներգրավված անձանց մասին տեղեկություններ չեն նշվում։