ԵՐԵՎԱՆ, 18 ապրիլի — Sputnik. ՀՀ վարչապետ Սերժ Սարգսյանը «Շանթ» հեռուստաընկերությանը տված հարցազրույցում՝ պատասխանելով Արամ Աբրահամյանի հարցերին` նշել է, որ վերջին տարիների ընթացքում Հայաստանում միայն 2017 թվականին է, որ արտաքին և ներքին անկայունություն չի եղել և հենց այդ ժամանակ էլ բարձր տնտեսական աճ է ապահովվել երկրում:
«Միակ տարին է երևի 2017թ-ը, երբ փողոցներում միտինգներ չկային, հանգիստ տուրիստներին կարելի էր գալ Երևան, ներդրողներին գալ ու ներդրումներ անել: Միակ տարին էր, և այդ տարին մենք ունեցել ենք 7,5 տոկոս տնտեսական աճ: Մեզ մի քանի տարի է պետք ընդամենը, մի քանի տարի, որպեսզի այս տնտեսական աճը մարդկանց համար շատ ավելի շոշափելի լինի»,- հարցազրույցի ժամանակ ասել է վարչապետը:
Թեև նա համոզմունք է հայտնել, որ անգամ այդ ժամանակ դժգոհություն է լինելու, որովհետև որքան մարդը ավելի լավ է ապրում, այնքան պահանջները մեծանում են: «Բայց խնդիրն այն է, որ մենք հասնենք այնպիսի նվազագույն մակարդակի, որպեսզի գոնե ցանկությունների կեսը մարդիկ կարողանան իրականացնել: Սա է ամբողջ խնդիրը»,- ընդգծել է Սերժ Սարգսյանը:
Հարցին, թե արդյոք երկրի տնտեսական աճին խանգարում են զանգվածային հանրահավաքները, վարչապետն ասել է, որ դրանք խանգարում են միայն այն ժամանակ, երբ անհամաչափ են դառնում։
«Մարդկանց իրավունքներն ու ազատություններն ամենաառաջնայինն են, գոնե մեր պատկերացումներն այդպիսին են: Այդ առաջնային իրավունքները, եթե իրապես իրականացվեն տրամաբանության սահմաններում, որևէ կերպ չեն խոչընդոտի տնտեսական զարգացմանը: Սակայն երբ դրանք դառնում են անհամաչափ, երբ դրանք վերածվում են խցանումների Երևանում, ապա ի՞նչ եք կարծում՝ դա կարո՞ղ է արդյոք դրականորեն ազդել»,- ասել է վարչապետը։
Ըստ նրա` զբոսաշրջիկները չեն գնա այն երկիր, որտեղ անկայուն վիճակ է, հանրահավաքներ են փողոցներում և հասարակական տրանսպորտը չի աշխատում և ոչ էլ ներդրողները նման երկրում գումարներ կնեդրնեն։
Նա այս վիճակը խնդրահարույց է համարում երկրի ու ժողովրդի համար։
Սերժ Սագսյանի հավաստիացմամբ` իշխանությունը որևէ պարագայում չի փորձի սահմանափակել մարդկանց իրավունքները, եթե դրանք չուղեկցվեն անօրինականություններով։
Սերժ Սարգսյանի հարցազրույցն ամբողջությամբ կներկայացվի ապրիլի 19-ին «Շանթ» հեռուստատեսության եթերով։