ԵՐԵՎԱՆ, 17 ապրիլի — Sputnik. Հայաստանն ունի դեմոգրաֆիական մեծ խնդիր, երբ ներուժը կարող է հասնել այնպիսի կետի, որ չբավարարի անգամ սահմանների պաշտպանության համար։
Խորհրդարանում, պատգամավորների հետ հարց ու պատասխանի ժամանակ, հայտարարեց Սերժ Սարգսյանը։
Անդրադառնալով տնտեսության խնդրին` Սերժ Սարգսյանը նշեց, որ իր նախագահության տարիներին ՀՆԱ-ն 2 տրիլիոն 656 մլրդ դրամից հասել է 5 տրիլիոն 580 մլրդ դրամի։
Հայաստանյան բանկերում նույն տարիներին, նրա խոսքով, աճել են նաև քաղաքացիների ավանդները՝ կազմելով 1 տրիլիոն 553 մլրդ դրամի, որի մեծ մասը մինչև 7 մլն դրամի ավանդներն են։
«Այնպես որ, թող չասեն, թե փող ունեցողները միայն մեծահարուստներն են»,-ասաց Սարգսյանը։
Այդուհանդերձ, վարչապետի թեկնածուն չհերքեց, որ կան սոցիալական, տնտեսական խնդիրներ ու արտագաղթ։ Ավելի մանրամասն տնտեսական խնդիրների լուծմանը ճանապարհները Սերժ Սարգսյանը խոստացավ շարադրել ապագա կառավարության ծրագրում։