ԵՐԵՎԱՆ, 17 ապրիլի — Sputnik, Լաուրա Սարգսյան. «Ելք» խմբակցության ղեկավար Նիկոլ Փաշինյանի ուսապարկում առաջին անհրաժեշտության իրեր են։ Այս մասին Sputnik Արմենիայի թղթակցին ասաց նրա կինը` Աննա Հակոբյանը։
Նիկոլ Փաշինյանը մարտի 31-ից Հայաստանի տարածքում նախաձեռնել է «Իմ քայլը» արշավը։ Մի քանի օրում Փաշինյանը և նրա համախոհների խումբը ոտքով անցել են ավելի քան 200 կիլոմետր` ակցիաներ անցկացնելով Գյումրիում, Վանաձորում, Սպիտակում, Դիլիջանում, Աբովյանում և Հրազդանում։ Ակցիայի վերջին կանգառը Երևանն է։ Դրանից հետո Փաշինյանը ոչ մի անգամ տանը չի եղել։
«Նրա ուսապարկում ամեն պահի պետքական իրեր են, օրինակ` հեռախոս, հեռախոսի մարտկոցներ, գլխարկ, ակնոց, արևային ակնոց, թաց անձեռոցիկ, «սանտավիկներ»։ Այն, ինչ այդ պահին անհրաժեշտ է։ Երբեմն պատահում է, որ բաճկոնն է հանում, դնում ուսապարկի մեջ, երբ շոգում է», — ասաց Հակոբյանը։
Նա նշեց նաև, որ քայլարշավի մեկնարկից մինչև այս պահը` արդեն 18 օր, Փաշինյանը տուն չի գնացել։
«Իմ քայլը» երթը վերածվել է բողոքի զանգվածային ակցիայի ապրիլի 16-ից։ Փաշինյանի կողմնակիցները դեմ են, որ Հայաստանի վարչապետը լինի Սերժ Սարգսյանը։ Մի քանի ժամում Փաշինյանի կողմնակիցները փակեցին Երևանի կենտրոնի գրեթե բոլոր փողոցները։ Մասամբ աշխատանքը դադարեցրեց մետրոն։ Երկուշաբթի երեկոյան ցուցարարների և ոստիկանության միջև տեղի ունեցան բախումներ, որի հետևանքով տուժեցին և՛ ակտիվիստներ, և՛ ոստիկանության աշխատակիցներ։
Առավոտից ակցիան շարունակվում է, այս պահին ցուցարարները հավաքվել են Հանրապետության հրապարակում։ Քիչ առաջ Հայաստանի խորհրդարանի հատուկ նիստում Սերժ Սարգսյանը վարչապետ ընտրվեց։ Նրա օգտին քվեարկեցին ներկա 94 պատգամավորներից 77-ը։ Դեմ քվեարկեցին 18 պատգամավոր։
Փաշինյանը հորդորել է ժողովրդին հավաքվել Հանրապետության հրապարակում` վստահեցնելով, որ սա Հայաստանի պատմության մեջ ամենամարդաշատ հանրահավաքն է լինելու։