ԵՐԵՎԱՆ, 16 ապրիլի — Sputnik. Երևանի Աբովյան-Կորյուն փողոցների խաչմերուկում երթևեկությունն արգելափակած ուսանողներին մոտեցած կինը խնդրում է բացել փողոցը։
«Հարգում եմ ձեր բողոքի իրավունքը, բայց որպես մայր` խնդրում են գոնե թույլ տվեք ավտոբուսներն աշխատեն»,- ասաց կինը` հավելելով, որ կես ժամ փորձել է զանգահարել ավտոբուսում մենակ գտնվող իր դպրոցական զավակին ու չի կարողացել։
«Չեք պատկերացնում, թե դա ինչ սարսափելի անհանգստություն է մոր համար։ Երեխաներն էլ անօգնական ու մենակ մնացել են ավտոբուսներում ու լաց են լինում»,- ասաց կինը։
Հիշեցնենք, որ այսօր առավոտյան 8։00-ից «Իմ քայլը» նախաձեռնության անդամներն ու անհնազանդության ակցիաներին միացած քաղաքացիները փակել են Երևանի կենտրոնական փողոցներն ու երթևեկելի հատվածներում աղբամաններով, նստարաններով ու ակցիայի մասնակիցների ավտոմեքենաներով բարիկադներ կառուցել։
Այս պահին փակ են Բաղրամյան պողոտան, Մոսկովյան, Իսահակյան, Կորյունի և Աբովյան փողոցները, Մաշտոցի-Ամիրյան փողոցների խաչմերուկը։