ԵՐԵՎԱՆ, 11 ապրիլի — Sputnik. ԶԼՄ-ների համար նախատեսված SputnikPro նախագծի շրջանակում «Արմենպրես» լրատվական գործակալությունն իր վիդեոբովանդակությունը միջազգային առումով ավելի համադրելի դարձնելու նպատակով համագործակցության համաձայնագիր ստորագրեց «Ruptly» լրատվական վիդեոգործակալության հետ։
SputnikPro-ի քննարկումներն անցկացվեցին ապրիլի 10-ին Sputnik Արմենիա լրատվական գործակալության հարթակում։
«Այս համագործակցությունը կայացավ Sputnik-ի գործընկերների և նրանց տրամադրած հարթակի շնորհիվ։ Շատ լավ մեկնարկ է տրվել։ Մենք կփոխանակվենք բովանդակությամբ, ինչ-որ բան կառաջարկենք մենք, ինչ-որ բան` նրանք», — Sputnik Արմենիայի թղթակցի հետ զրույցում ասաց «Ruptly» տեղեկատվական վիդեոգործակալության Ռուսաստանի և ԱՊՀ-ի տարածաշրջանային կառավարիչ Ինդիրա Ժարովան:
Նրա խոսքով`սկզբից կառաջարկվի առանց սահմանափակումների օգտվել Ruptly-ի արդեն մոնտաժված տեսանյութերից, ուղիղ հեռարձակումներից։ Համաձայնագիրը փորձնական է` ստորագրված երեք ամսով։
«Հայաստանն առանցքային երկիր է համարվում տարածաշրջանում, ուստի ձեր երկրից նորությունների հանդեպ հետաքրքրությունը բարձր է ինչպես Ռուսաստանում, այնպես էլ նրա սահմաններից դուրս», — բացատրեց Ժարովան։
«Արմենպրես» լրատվական գործակալության ղեկավար Արամ Անանյանը նշեց, որ Ruptly-ի հետ համագործակցությունը թույլ կտա զարգացնել գործակալության վիդեոբովանդակությունը։
««Արմենպրեսի» գործունեության մեջ մենք մեծապես կարևորում ենք այն հանգամանքը, որ մեր արտադրած բովանդակության բոլոր տեսակները լինեն միջազգային չափանիշներին համապատասխան: Այս առումով կնքված համաձայնագիրը հնարավորություն կտա՝ թե մեզ համար հասանելի դարձնել «Ruptly»-ի բովանդակությունը, թե «Արմենպրեսի» բովանդակությունը` մեր գործընկերոջ համար, ինչպես նաև հնարավորություն կլինի բարձրացնել վիդեոարտադրանքի որակը»,-ասաց Արամ Անանյանը:
«Հատկանշական է, որ «Արմենպրեսի» և «Ruptly»-ի հետ արդյունավետ ծանոթությունը կայացավ մեր հարթակում: Այն տեղի է ունեցել Երևանում անցկացված «SputnikPro» կրթական ծրագրի շրջանակում, որն իրականացվել է «Sputnik» միջազգային լրատվական գործակալության և ռադիոյի կողմից: Նպատակն է բարձրացնել լրատվամիջոցների պրոֆեսիոնալիզմը, ստեղծել մրցակցային միջավայր, որը բերում է զարգացումների: Ահա այս հարթակում, երբ «Ruptly»-ն ներկայացրեց իր նախագծերը, «Արմենպրեսը» հետաքրքրություն ցուցաբերեց, ինչն էլ հանգեցրեց այս համաձայնագրի ստորագրմանը», — ասաց Sputnik Արմենիա լրատվական գործակալության և ռադիոյի ղեկավար Դմիտրի Պիսարենկոն։
Երևանն առաջիններից է միացել հետխորհրդային տարածքի ԶԼՄ-ների համար նախատեսված SputnikPro նախագծին։
SputnikPro-ի ընթացքում շնորհանդեսներ և վարպետության դասեր են անցկացնում ռուսական լավագույն մեդիամենեջերներն ու առաջատար մասնագետները, որոնք ԶԼՄ-ներում աշխատելու վիթխարի փորձ ունեն։ Ծրագիրը լրագրողներին է ներկայացրել ժամանակակից մուլտիմեդիոն լրատվական գործակալության չափանիշները և աշխատանքի տեխնոլոգիաները։ Վարպետության դասընթացների առաջին շարքն անցկացվել է Մինսկում, երկրորդը` Թբիլիսիում, հաջորդը` Երևանում։
Sputnik Արմենիան գործունեությունը սկսել է 2015 թվականի հուլիսին և Sputnik միջազգային նախագծի մի մասն է կազմում։ Գործակալության պորտալը ներառված է երկրի առաջատար առցանց ԶԼՄ-ների լավագույն հնգյակում։
Sputnik-ը լրատվական գործակալություն և ռադիո է ` տասնյակ երկրներում մուլտիմեդիոն տեղեկատվական ներկայացուցչություններով: Sputnik-ը ներառում է ավելի քան 30 լեզվով կայքեր, անալոգային և թվային ռադիոհեռարձակում, բջջային հավելվածներ և էջեր սոցիալական կայքերում։ Sputnik-ի լուրերը շուրջօրյա ռեժիմով թողարկվում են անգլերեն, արաբերեն, իսպաներեն և չինարեն: