ԵՐԵՎԱՆ, 11 ապրիլի — Sputnik. Հայաստանի կառավարության առաջիկա նիստերից մեկում որոշման նախագիծ կընդունվի առանձնակի հաջողությունների հասած երիտասարդներին զինվորական ծառայությունից տարկետում տալու մասին, որում սահմանված են նաև համապատասխան չափորոշիչները:
Ազգային ժողովում կառավարության հետ հարցուպատասխանի ժամանակ այս մասին ասաց ՀՀ պաշտպանության նախարարի պաշտոնակատար Վիգեն Սարգսյանը՝ պատասխանելով «Ելք» խմբակցության պատգամավոր Գևորգ Գորգիսյանի հարցին:
«Առաջիկա նիստերից մեկում նախագիծը կառավարության որոշման տեսքով ընդունվելու է: Նախագծում եղած չափորոշիչները կարելի է հիմք ընդունել»,- ասաց Սարգսյանը:
Նախարարի պաշտոնակատարն ավելացրեց, որ շատ ինտենսիվ քայլեր են ձեռնարկվում ԶՈւ կազմում գիտական վաշտ ձևավորելու ուղղությամբ՝ այն նորակոչիկների համար, որոնք կարող են ծառայության ընթացքում ավելի օգտակար լինել իրենց գիտելիքներով ԶՈւ խնդիրների լուծմանը։