ԵՐԵՎԱՆ, 11 ապրիլի — Sputnik. «Էվրիկա Գրուպ» ՍՊԸ-ին պատկանող 4 սուպերմարկետներում մեծ քանակությամբ մակնշման անհամապատասխանություններով սննդամթերք է հայտնաբերվել` ոլոռ, մարինացված սնկի տեսականի, դոնդող, սառը սուրճ, ձիթապտուղ և եգիպտացորեն, ձիթապտղի յուղ, բուսական այլ յուղեր, կաթ, սերուցք, քացախաթթվի տեսակներ, խուրմա, մարինացված ծիծակ, մանանեխ, չաման, կարագ, պահածոյացված սպիտակ ու կարմիր լոբի, խտացրած կաթ, վարսակի փաթիլներ, սոուսներ, նռան նաշարաբ, շերտավոր խմոր, թխեմալի, կետչուպ, մեղր, տարբեր տեսակի պանիրներ, քաղցրավենիքներ, պահածոյացված պղպղեղ, տարբեր տեսակի նրբերշիկներ, թթու բանջարեղեն, աջիկա, խաշ, երշիկներ, չորացրած և ծխեցրած ձկներ, հնդկական ընկույզ, գարեջուր, մսային ռուլետ, պելմեններ (ընդհանուր առմամբ՝ 643 հատ և 49 կգ):
Այս մասին տեղեկացնում է ՀՀ կառավարությանը ենթակա սննդամթերքի անվտանգության տեսչական մարմնի մամուլի ծառայությունը` տեղեկացնելով, որ բոլոր ապրանքատեսակները հանվել են վաճառքից:
Խանութներից մեկում հայտնաբերվել են նաև մի քանի ժամկետանց մթերքներ՝ հաց, սփրեդ, բուժենինա և երշիկ, որոնք վաճառքից հանվել ու տեղում ոչնչացվել են:
Տեսչական մարմինը վերահսկողության շրջանակներում մակնշման անհամապատասխանություններով և ժամկետանց սննդամթերք արդեն իսկ հայտնաբերել էր «Էվրիկա Գրուպ» սուպերմարկետների ցանցի խանութներից երեքում: