ԵՐԵՎԱՆ, 10 ապրիլի — Sputnik. Ապրիլի 10-ին ՀՖՖ շտաբ-բնակարանում կայացած ՀՖՖ Գործկոմի հերթական նիստում Հայաստանի ֆուտբոլի հավաքականի գլխավոր մարզիչ ընտրվեց Վարդան Մինասյանը: Այս մասին տեղեկացնում է ՀՖՖ պաշտոնական կայքը
Քվեարկությունից առաջ ՀՖՖ նախագահ Ռուբեն Հայրապետյանը առաջարկեց քննարկել Վարդան Մինասյանի թեկնածությունը:
Գործկոմի անդամները միաձայն կողմ արտահայտվեցին ներկայացված թեկնածության վերաբերյալ և Վարդան Մինասյանը հաստատվեց Հայաստանի ազգային հավաքականի գլխավոր մարզչի պաշտոնում:
Միևնույն ժամանակ Հայաստանի երիտասարդական հավաքականի գլխավոր մարզիչ հաստատվեց Արմեն Գյուլբուդաղյանցը: Գործկոմի նիստում քննարկվեցին նաև այլ ընթացիկ հարցեր:
Կենսագրական տվյալներ
Վարդան Մինասյանը ծնվել է 1974թ.–ի հունվարի 5ին, Երևան։ Նա հայ ֆուտբոլային մարզիչ է, նախկին ֆուտբոլիստ (կիսապաշտպան)։
Հանդես է եկել «Զանգեզուր», ՀՄՄ (հետագայում՝ «Փյունիկ»), «Էրեբունի», «Լոզան», «Լոկոմոտիվ» (Սանկտ-Պետերբուրգ) թիմերում։
1996-1999 թթ. եղել է Հայաստանի ազգային հավաքականի ֆուտբոլիստ, որի կազմում մասնակցել է 11 հանդիպման։
Վարդան Մինասյանն իր մարզչական կարիերան սկսել է Փյունիկում որպես մարզիչի օգնական։ Նա նաև եղել է Հայաստանի ֆուտբոլի ազգային հավաքականի նախկին մարզիչ Յան Պորտերֆիլդի օգնական։ 2008 թվականի հունվարին, երբ Հայաստանի հավաքականի մարզիչ դարձավ Յան Պոուլսենը, Վարդան Մինասյանը մնաց մարզչի օգնական։
Այնուհետև 2009 թվականի մարտին, երբ Պուլսենը հեռացավ Հայաստանի հավաքականից, Վարդան Մինասյանը դարձավ Հայաստանի հավաքականի մարզիչ։ 2008 թվականին Վարդան Մինասյանը դարձավ Փյունիկի մարզիչ։ 2014 թ-ին մեկ մրցաշրջան գլխավորել է ղազախական «Տոբոլը»։
Վարդան Մինասյանը Հայաստանի ազգային հավաքականի լավագույն արդյունք ցույց տված մարզիչն է: Նրա գլխավորությամբ մեր ընտրանին Եվրո-2012-ի ընտրական մրցաշարում զբաղեցրեց երրորդ տեղը և շատ մոտ էր անցումային խաղերին մասնակցելուն: Մինչև կրկին հավաքական վերադառնալը Մինասյանը կոորդինացնում էր Հայաստանի պատանեկան հավաքականների հետ կապված աշխատանքները: