ԵՐԵՎԱՆ, 9 ապրիլի — Sputnik. Հայաստանի ընդդիմությունն այս տարիներին չի կարողացել գտնել միասնության բանաձևը։ Այդ մասին երկուշաբթի լրագրողներին ասաց «Ժառանգություն» կուսակցության նախագահ Րաֆֆի Հովհաննիսյանը Հայաստանի նոր նախագահ Արմեն Սարգսյանի երդմնակալության արարողությունից հետո։
Կաջակցի՞ արդյոք «Ժառանգությունը» ընդդիմադիր Նիկոլ Փաշինյանի երթին, որն ուղղված է Սերժ Սարգսյանի դեմ։ Այս հարցին Հովհաննիսյանը դիվանագիտական պատասխան տվեց` բարոյապես աջակցում է, բայց չի պատրաստվում միանալ։
«Հինգ տարի առաջ` նախագահական ընտրություններից հետո, «Ժառանգությունը» փորձեց հավաքել ընդդիմության ցրված ուժերը։ Եթե հիմա դա փորձի անել ինչ-որ մեկը, մենք ուրախ կլինենք։ Ե՛վ Նիկոլը, և՛ Զարուհի Փոստանջյանը, և՛ բողոքի շարժման այլ մասնակիցներն օգտակար գործ են անում», — ասաց Հովհաննիսյանը։
ՀՀԿ խորհրդարանական խմբակցության ղեկավար Վահրամ Բաղդասարյանն իր հերթին ասաց, որ Հայաստանը ժողովրդավարական երկիր է, որտեղ բողոքելն օրինական է։
«Դե ինչ, բարի ճանապարհ։ Քայլելն օգտակար է առողջության համար։ Ժողովրդավարական երկրում յուրաքանչյուր քաղաքական ուժ ինքն է ընտրում բողոքի օրինական միջոցները։Անօրինական միջոցների փորձերի դեպքում նրանց պատշաճ կերպով կնախազգուշացնեն»։
Հիշեցնենք, որ Հայաստանի խորհրդարանի պատգամավոր, «Ելք» դաշինքի ընդդիմադիր դաշինքի խմբակցության ղեկավար Նիկոլ Փաշինյանը քայլարշավ է անցկացնում Հայաստանի քաղաքներով` բողոքելով վարչապետի պաշտոնում Սերժ Սարգսյանի առաջադրվելու դեմ (արդեն Հայաստանի նախկին նախագահի)։
Նոր վարչապետին խորհրդարանը կընտրի ապրիլի 17-ի նիստում։ Իշխանությունն առայժմ չի նշում իր թեկնածուի (դե ֆակտո ապագա վարչապետի) անունը։