Ապրիլի 8–ի երեկոյան ժամը 17։00–ի սահմաններում հակառակորդը գնդակոծության է ենթարկել Տավուշի մարզի Բաղանիս գյուղի վարչական տարածքը։
Sputnik Արմենիայի հետ զրույցում Բաղանիսի համայնքապետ Նարեկ Սահակյանը հաստատեց այս լուրը` հավելելով, որ գնդակոծության է ենթարկվել գյուղի վարչական տարածքը, բայց ոչ բնակավայրը։
«Թշնամու թիրախում եղել է «Ջրհովքեր» տեղամասը։ Գնդակոծության հետևանքով սատկել է բաղանիսցի Սուրիկ Ալեքսանյանին պատկանող կովը, նրա 2 մոզին ենթարկվել են հարկադիր մորթի։ Գյուղացիներից մեկի 2 մոզիներն էլ են վիրավորվել են»,–ասաց Սահակյանը։
Ըստ համայնքապետի` թշնամին նպատակաուղղված նյութական վնաս է հասցրել։
«Հաճախ առաջարկում են կրակից պաշտպանող պատնեշներ կառուցել, բայց դրանք անիմաստ են, որովհետև հակառակորդի դիրքերը շատ բարձր են և որևէ պատնեշ չի կարող պաշտպանել»,–ընդգծեց Նարեկ Սահակյանը։
Համայնքապետի խոսքով` գյուղատնտեսական եռուն շրջան է, այս պահին գյուղացիները խաղողի այգիներում էտ են իրականացնում, այս միջադեպից հետո նրանք առավել զգոն են։
Հիշեցնենք, որ գյուղը վերջին անգամ գնդակոծվել է մեկ ու կես ամիս առաջ։