ԵՐԵՎԱՆ, 9 Ապրիլ — Sputnik. ՀՀ նախագահի պաշտոնը ստանձնելը մեծ պատիվ համարելով հանդերձ` Արմեն Սարգսյանն այն նաև մեծագույն պատասխանատվություն է համարում երկրի ու ժողովրդի առջև։ Այս մասին այսօր ՀՀ 4-րդ նախագահն ասաց նախագահի պաշտոնի ստանձնման երդմնակալության արարողության ժամանակ։
«Հանուն Արցախի մղած ազատամարտը մեզ վերադարձրեց մեր արժանապատվությունը, բարձրացրեց մեր ոգին, և այսօր որևէ մեկը թող չկասկածի, որ Հայաստանը և ողջ հայ ժողովուրդը կանգնած է Արցախի թիկունքին ու պայքարելու է նրա արդար իրավունքների համար»,- անդրադառնալով Հայաստանի անցած անկախության ուղուն` ասաց նորընտիր նախագահը։
Ընդգծելով ՀՀ նախկին 3 նախագահների` Լևոն Տեր Պետրոսյանի, Ռոբերտ Քոչարյանի ու Սերժ Սարգսյանի օրոք կատարված աշխատանքները` Սարգսյանն ընդգծեց, որ ԽՍՀՄ փլուզման, Սպիտակի ավերիչ երկրաշարժի, Արցախի գոյամարտի, քայքայված տնտեսության ու շրջափակման պայմաններում, անցնող 30 տարում Հայաստանին, այնուամենայնիվ, հաջողվեց ստեղծել պետական կուռ համակարգով, բաց հասարակությամբ ու համամարդկային արժեքներով առաջնորդվող երկիր։
«Երկիր, որն իրավամբ վայելում է համաշխարհային հանրության հարգանքը և վստահելի գործընկերոջ համբավը։ Հակառակ դեռևս առկա խնդիրներին, սա պատմական շատ կարևոր ձեռքբերում է»,- ասաց Սարգսյանը։
Անդրադառնալով ՀՀ անդամակցությանը ԵԱՏՄ-ին և ԵՄ հետ ստորագրված համաձայնագրին` ՀՀ նախագահը նշեց, որ դրանք երկրի տնտեսության զարգացման համար նոր հեռանկարներ ու հնարավորություններ են բացում, իսկ խորհրդարանական կառավարման համակարգը լավագույն հնարավորություններ է ստեղծում դրա համար։
«Այսօր մեր երկրի ու մեր ժողովրդի համար առանցքային է մնում արցախյան հակամարտության խաղաղ և բանակցային կարգավորումը։ Դրա առաջին երաշխիքը հզոր Հայաստանն ու ամուր Արցախն են։ Արցախի ժողովրդի իրավունքները լավագույնս պաշտպանելու համար մենք պետք է շարունակենք կերտել ամուր, տնտեսապես զարգացող, ծաղկուն և հզոր Հայաստան»,- ասաց Սարգսյանը։
Իսկ դրա համար, նրա խոսքով, ողջ հասարակությունը պետք է պայքարի առկա բացասական երևույթների`կոռուպցիայի, սոցիալական արդարության, անտարբերության ու անարդարության դեմ։ Իսկ այդ պայքարում, ըստ Արմեն Սարգսյանի, յուրաքանչյուրն ունի իր դերն ու անելիքը։
Անդրադառնալով Հայաստան-Արցախ- Սփյուռք եռամիասնությանը` նորընտիր նախագահը ազգային միասնության ամենակարևոր հենարանը կոչեց Հայ առաքելական եկեղեցին։
«Համազգային խնդիրների լուծման միասնական մեխանիզմների մշակման համար անհրաժեշտ է մշակել արդյունավետ նոր մեխանիզմներ` միացյալ օրակարգ, ընդհանուր պատասխանատվություն և միասնական ջանք»,- ասաց նա` վստահություն հայտնելով, որ Հայաստանի Հանրապետությանը հաջողվելու է օր առաջ հասնել այս բանաձևի կենսագործմանը։ Նրա խոսքով` փոքր երկիր, համաշխարհային ազգ. սա է մեր էությունը։
Արմեն Սարգսյանը կարևորեց նաև արտագաղթը կանխելու ու հայրենիքից հեռացածներին հայրենիք վերադարձնելու ծրագրերի իրականացումը, բայց ոչ թե լուսավոր խոստումների, այլ ռեալ իրականության տեսքով։
«Աշխարհն, ուր ապրելու են մեր երեխաները, փոփոխվում է շատ արագ, վերածվում մրցակցության հսկայական դաշտի։ Մենք պետք է դրան պատրաստ լինենք, ներդրումներ անենք գիտության, նոր տեխնոլոգիաների, կրթության, մշակույթի ոլորտներում, կապ հաստատենք աշխարհի լավագույն գիտական, կրթական ու հետազոտական կենտրոնների հետ, ներգրավենք նոր գաղափարներ, փոխառենք լավագույն փորձն ու այս ամենի հիման վրա ստեղծենք մեր յուրօրինակ լուծումներն ու դրանք առաջարկենք աշխարհին»,- ասաց նա։
Սարգսյանը խոստացավ ոչ միայն որպես երկրի նախագահ, այլև որպես գիտության ու տեխնոլոգիաների բնագավառում որոշակի փորձ ունեցող մարդ, միշտ լինել Հայաստանի ու Արցախի երիտասարդ սերնդի կողքին։