Sputnik, Լև Ռիժկով
Էկրանին հայտնվելուց առաջ Սաթին հանդիպել է հայտնի հայրենակցի՝ ջազային երգչուհի Մարիամ Մերաբովայի հետ։ Հանդիպումն անմոռանալի է եղել և՛ Սաթենիկի, և՛ Մարիամի համար։ Երիտասարդ գյումրեցին իր տաղանդով ապշեցրել է աստղին։
Փորձում ենք ջազ երգել
Աստղի հետ հանդիպումից առաջ Սաթին մի փոքր հուզվում էր, թեև փորձում էր դա թաքցնել։ Հետո Սաթին խոստովանեց, որ վաղը նրա ծննդյան օրն է. տասնհինգ տարեկան է դառնում։ Ու լեգենդար Մարիամի հետ հանդիպումն ամենալավ նվերն է։ Ամեն դեպքում այս հանդիպումը հաստատ կհիշի ամբողջ կյանքի ընթացքում։
Ստուդիան, որտեղ Մարիամ Մերաբովան իր երաժիշտների հետ փորձեր է անում ու ձայնագրվում, Կրասնայա Պրեսնայի տներից մեկի նկուղային հարկում է։ Տարածքը հարմարավետ է ու հետաքրքիր ձևավորում ունի։ Մտնելուց առաջ հյուրերն անպայման բախիլներ են հագնում։
Մարիամը գրկաբաց ընդունեց երիտասարդ հյուրին, միանգամից ուղեկցեց ստուդիա։ Երկու երգչուհիներն էլ հարմար տեղավորվեցին փափուկ աթոռներին։
«Դո՛ւ էլ, ե՛ս էլ ժողովրդական երգեր ենք երգում, — ասաց Մարիամ Մերաբովան, — չէ որ ջազը նույնպես ժողովրդական, ազգագրական երգ է։ Այն հիմնվում է հին երգերի վրա։ Ուշադիր լսիր Ջորջ Գերշվինի «Պորգի և Բեսս» օպերայի հայտնի Summertime-ը։ Դա նույնպես ժողովրդական երաժշտություն է, չէ՞»։
Մարիամը որոշեց Սաթիին ջազ երգել սովորեցնել, բայց աղջկան չհաջողվեց առաջին անգամից ըմբռնել ջազային ստանդարտների էությունը։ Նա սովոր է ժողովրդական երգացանկին, որն ավելի մեղմ է, երգեցիկ, ու նրա համար դժվար էր առաջին անգամից ընտելանալ ջազի կտրատված ռիթմին։ Անծանոթ անգլերենն էլ ավելի խճճեց իրավիճակը։
Այ քեզ հրաշք
Սակայն իզուր չէ, որ Սաթի Գևորգյանը հասել է բարդ վոկալային մրցույթի կիսաեզրափակիչ փուլ։ Այո, նրան չհաջողվեց ջազ երգել, բայց երբ Մարիամն առաջարկեց հյուրին ժողովրդական երգի անցնել, Սաթին ցույց տվեց իր ձայնի հզորությունը։
Մարիամ Մերաբովան չթաքցրեց զարմանքը։ Նա կախարդվածի պես լսեց աղջկան, և երբ Սաթենիկը վերջացրեց, ջազային աստղը միայն ասաց․ «Այ քեզ հրաշք»։
Մարիամը Սաթիին խորհուրդ տվեց երգել տաճարում, վանքում կամ եկեղեցում և զգալ՝ ինչ յուրահատուկ ձևով կհնչի այնտեղ նրա ձայնը։
«Ես Էջմիածինում եմ երգել», — համեստորեն խոստովանեց Սաթին։
«Ինչ հետաքրքիր է։ Ժամանակին ինձ այնտեղ կնքել են», — ասաց Մարիամ Մերաբովան։
Ջազային երգչուհին կիսաեզրափակիչ անցած երգչուհուն բազում խորհուրդներ տվեց։ Օրինակ` որ մարդ միշտ պետք է լսի իր հոգու ձայնը։
«Եթե մարդը զբաղվում է երաժշտությամբ, այլ ոչ թե շոու-բիզնեսով, ապա նա կարող է իր ունակությունները փորձել ամենատարբեր ոճերում, — ասաց Մարիամը, — ամենայն հավանականությամբ, ամեն ինչ կստացվի։ Սակայն առանց հոգևոր զարգացման ոչինչ չի ստացվի։ Մասնագիտությունը զարգանում է առաջին հերթին ոչ թե երգի վարժություններով, այլ քո կենսակերպով, քո մտքերով։ Թե ինչպես ես հասկանում աստվածային օրենքները։ Այդ ժամանակ ձայնն ինքն է քեզ մոտ գալիս։ Հենց այս է գլխավորը, այլ ոչ թե այն, թե քանի բաժանորդ ունես Instagram-ում»։
Մարիամը խոստովանեց, որ Հայաստանը հոգևոր լարվածությունը թոթափելու վայր է։ Մերաբովան Սաթենիկ Գևորգյանին հաղթանակ մաղթեց կիսաեզրափակիչ փուլում, որը կկայանա այսօր` ապրիլի 7-ին։