ԵՐԵՎԱՆ, 5 ապրիլի — Sputnik. Երեխաների նկատմամբ սեռական բնույթի հանցագործությունների թիվը Հայաստանում կրճատվել է։ Այս մասին լրագրողների հետ հանդիպմանն ասաց ՀՀ քննչական կոմիտեի իրավական ապահովման և վիճակագրական վարչության պետ Դավիթ Թումասյանը։
«Երեխաների նկատմամբ ոտնձգությունները քչացել են, բայց դա չի անդրադարձել ընդհանուր պատկերի վրա», — ասաց Թումասյանը։
2015 թվականին սեռական բնույթի 131 հանցագործություն է գրանցվել, որոնցից 84-ը` երեխաների նկատմամբ։ 2016 թվականին սեռական բնույթի դեպքերի կապված 157 գործ է քննվել, որոնցից 110-ը վերաբերել են երեխաներին։ 2017 թվականին սեռական բնույթի հանցագործությունների ընդհանուր աճի ֆոնին (161 դեպք) երեխաների նկատմամբ դեպքերը կրճատվել են։
2015 թվականին սեռական բռնությունից տուժել են 76 երեխա, 2016-ին` 115, 2017-ին` 103։ Ամենափոքրը 4 տարեկան երեխա է եղել։ Հանցագործությունների մեծ մասը կապված է 14-16 տարեկան երեխաների հետ։
«Կան դեպքեր, երբ դեռահասներն անձամբ են սադրում բռնությունը, երբ նրանց բռնի ուժով ստիպում են սեռական հարաբերություններ ունենալ, կամ մեծահասակները օգտվում են երեխայի միամտությունից և սեռական բնույթի բռնություն իրականացնում», — ասաց Թումասյանը։
Երեխաների նկատմամբ սեռական բռնության ամենաշատ դեպքերը գրանցվել են Արմավիրի մարզում, ամենաքիչը` Վայոց Ձորում։
Սեռական բռնության զոհ են դառնում նաև ծերերը, ինչպես նաև օտարերկրացիները։ 2016 թվականին ամենատարեց մարդը, որը տուժել է նման դեպքերից, 62 տարեկան է եղել, 2017 թվականին` 74 տարեկան։
Եթե Հայաստանում 2015 թվականին օտարերկրյա քաղաքացիների նկատմամբ բռնության ոչ մի դեպք չի գրանցվել, ապա 2016 թվականին տուժել են 2 մարդ (Մոլդովայի և Ռուսաստանի քաղաքացի), 2017 թվականին` նույնպես երկու մարդ (Ռուսաստանի և Չինաստանի քաղաքացի)։
Ինչ վերաբերում է ընտանեկան բռնության դեպքերին ընդհանրապես (ոչ միայն սեռական բնույթի), ապա պատկերը հետևյալն է.
2017 թվականին մոր կողմից երեխայի նկատմամբ բռնության 5 դեպք է գրանցվել, 17 դեպք` հոր կողմից, 1 դեպք` խորթ մոր կողմից, 2 դեպք` խորթ հոր կողմից, 6 դեպք` եղբոր կամ քրոջ կողմից, 2 դեպք` տատիկի կամ պապիկի, ծնողի նկատմամբ երեխայի կողմից իրականացրած բռնության 35 դեպք, 13 դեպք, երբ կինն է ամուսնու նկատմամբ բռնություն կիրառել, 167 դեպք, երբ ամուսինն է կնոջ նկատմամբ բռնություն կիրառել, 6 դեպք` թոռների կողմից տատիկների կամ պապիկների նկատմամբ, 8 դեպք` ամուսնու կամ կնոջ ծնողների կողմից հարսի կամ փեսայի նկատմամբ, 13 դեպք` հարսի կամ փեսայի կողմից ամուսնու կամ կնոջ ծնողների նկատմամբ, 1 դեպք` դայակի կողմից երեխայի նկատմամբ։
«Այս հանցագործությունները քրեորեն պատժելի են, և այստեղ չեն դիտարկվել մասնավոր մանր վեճերը», — ասաց Թումասյանը։
Թումասյանն անդրադարձավ նաև 2018 թվականի հունվարի 31-ից ուժի մեջ մտած «Ընտանեկան բռնության կանխարգելման և ընտանեկան բռնության ենթարկված անձանց պաշտպանության մասին» օրենքին։ Նա ընդգծեց, որ օրենքի կիրառումը պետք է հեշտացնի իրավապահ մարմինների գործունեությունը և թույլ տա նրանց ավելի լավ պաշտպանել այն քաղաքացիներին, որոնք դրա կարիքն ունեն։
Հայաստանի խորհրդարանը «Ընտանեկան բռնության կանխարգելման և ընտանեկան բռնության ենթարկված անձանց պաշտպանության մասին» օրենքի լրացումներն ու փոփոխություններն ընդունեց 2017 թվականի դեկտեմբերին։