ԵՐԵՎԱՆ, 4 ապրիլի — Sputnik. Մոսկվան հույս ունի, որ «Սկրիպալի գործում» առողջ բանականությունը կհաղթի։ Նման հայտարարություն է արել ՌԴ նախագահ Վլադիմիր Պուտինը։
«Մենք ոչինչ չենք ակնկալում, միայն հույս ունենք, որ ի վերջո առողջ բանականությունը կհաղթի, և միջազգային հարաբերություններին մեծ վնաս չի հասցվի, մի բան, որ նկատվում է վերջին ժամանակաշրջանում»,- Անկարայում կայացած ՌԴ-Իրան-Թուրքիա եռակողմ գագաթաժողովի արդյունքների ամփոփման մամուլի ասուլիսի ժամանակ ասել է Պուտինը։
Ինչպես հայտարարել է Ռուսաստանի առաջնորդը, «դա վերաբերում է ոչ միայն Սկրիպալի գործին, այլև միջազգային հարաբերությունների մնացած բոլոր կողմերին։
Ռուսաստանի և Մեծ Բրիտանիայի հարաբերոթյունները կտրուկ սրվել են բրիտանական Սոլսբերիում տեղի ունեցած դեպքի պատճառով։ Հենց այդ քաղաքում են թունավորել Բրիտանիայի հատուկ ծառայությունների համար աշխատող ռուսական հետախուզական վարչության նախկին գնդապետ Սերգեյ Սկրիպալին և նրա դստերը` Յուլյային։ Լոնդոնում պնդում են, որ Սրիպալին A234 նյարդապարալիտիկ նյութով թունավորելու գործին մասնակից է Ռուսաստանը, մինչդեռ Ռուսաստանը կտրականապես հերքում է դա` հիշեցնելով, որ Սոլսբերիի մոտակայքում է գտնվում Մեծ Բրիտանիայի պաշտպանության նախարարության քիմիական լաբորատորիան։